മങ്കട: പകര്‍ച്ചപ്പനി വ്യാപകമായതിനെ തുടര്‍ന്ന് ചികിത്സ തേടിയെത്തുന്ന രോഗികളുടെ എണ്ണം ക്രമാതീതമായി വര്‍ധിച്ചതോടെ മങ്കട കമ്യൂണിറ്റി സെന്ററില്‍ വൈകുന്നേരങ്ങളില്‍ ഒ.പി സൗകര്യം ഏര്‍പ്പെടുത്താാന്‍ ആശുപത്രി മാനേജ്‌മെന്റ് കമ്മിറ്റി യോഗത്തില്‍ തീരുമാനം.
ആശുപത്രിയില്‍ ഡോക്ടര്‍മാരുള്‍പ്പെടെയുള്ള സ്റ്റാഫിനെ നിയമിക്കുന്നത് ഭരണ ചുമതലയുള്ള ബ്ലോക്ക് പഞ്ചായത്താണ്. ഇതിനായുള്ള പണം ചെലവഴിക്കുന്നതിന് സര്‍ക്കാര്‍ അനുമതി ലഭിച്ചിട്ടുണ്ട്.  ഇതോടെ രാവിലെ എട്ടു മുതല്‍ വൈകിട്ട് ആറുവരെ ഡോക്ടര്‍മാരുടെ സേവനം ഇവിടെ ലഭ്യമാകും.
ഒരു ഡോക്ടറെയും ഒരു സ്റ്റാഫിനെയുമാണ് ആദ്യ ഘട്ടത്തില്‍ ബ്ലോക്ക് പഞ്ചായത്ത് നിയമിക്കുന്നത്. ആവശ്യമെങ്കില്‍ കൂടുതല്‍ ഡോക്ടര്‍മാരെ നിയമിക്കുന്ന കാര്യം പിന്നീട് തീരുമാനിക്കും. ജൂലൈ ഒന്നു മുതല്‍ ഒ.പി ആരംഭിക്കാനാകുമെന്നാണ് കരുതുന്നത്.
 29ന്  ഇന്റര്‍വ്യൂ നടത്തും. ആവശ്യമായ മരുന്നുകള്‍ ലഭ്യമാക്കുന്നതിന് നടപടി സ്വീകരിക്കാനും തീരുമാനിച്ചു. അറുനൂറോളം പേരാണ് നിത്യവും ചികിത്സ തേടി മങ്കട ആശുപത്രിയിലെത്തുന്നത്. ആശുപത്രി സമയം കഴിഞ്ഞ് സ്വകാര്യ ക്ലിനിക്കുകളെ ആശ്രയിക്കുന്നവരുടെ എണ്ണവും കുറവല്ല. ഈ സാഹചര്യത്തിലാണ് വൈകുന്നേരം ഒ.പി ആരംഭിക്കുന്നത്. മങ്കട ബ്ലോക്ക് പ്രസിഡന്റ് ഇ സഹീദ  അധ്യക്ഷയായി.