കോഴിക്കോട്: ജില്ലയില്‍ 29 വരെ കനത്ത മഴയ്ക്കും ചിലയിടങ്ങളില്‍ അതിശക്തമായ മഴയ്ക്കും സാധ്യതയുള്ളതിനാല്‍ ജനങ്ങള്‍ ജാഗ്രത പാലിക്കേണ്ടതാണെന്ന് ജില്ലാ കലക്ടര്‍ യു.വി ജോസ് അറിയിച്ചു. മഴവെള്ളപ്പാച്ചിലുണ്ടാകാന്‍ സാധ്യതയുള്ളതിനാല്‍ പുഴയില്‍ ഇറങ്ങുന്നത് അപകടത്തിന് കാരണമായേക്കും. മലയോര മേഖലകളില്‍ റോഡുകള്‍ക്ക് കുറുകെയുള്ള ചെറിയ ചാലുകളിലൂടെ മലവെള്ളപ്പാച്ചിലും ഉരുള്‍പൊട്ടലും ഉണ്ടാകാന്‍ സാധ്യതയുള്ളതിനാല്‍ രാത്രികാല യാത്രകളില്‍ കൂടുതല്‍ ജാഗ്രത പുലര്‍ത്തണം.
മരങ്ങള്‍ക്ക് ചുവട്ടില്‍ വാഹനങ്ങല്‍ പാര്‍ക്ക് ചെയ്യുന്നത് ഒഴിവാക്കണം. ബീച്ചുകളിലെത്തുന്ന വിനോദ സഞ്ചാരികള്‍ കടലില്‍ ഇറങ്ങാതിരിക്കാന്‍ ശ്രദ്ധിക്കണം. ദുരന്തനിവാരണ പ്രവര്‍ത്തനങ്ങള്‍ ഏകോപിപ്പിക്കുന്നതിനായി ജില്ലാ-താലൂക്ക്തല കേന്ദ്രങ്ങളില്‍ 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം ആരംഭിച്ചിട്ടുണ്ടെന്നും കലക്ടര്‍ പ്രസ്താവനയില്‍ സൂചിപ്പിച്ചു. ഫോണ്‍ നമ്പര്‍ ജില്ലാ അടിയന്തരഘട്ടകാര്യ നിര്‍വഹണകേന്ദ്രം: 0495-2371002, ടോള്‍ ഫ്രീ നമ്പര്‍: 1077, കോഴിക്കോട് താലൂക്ക് - 0495-2372966, കൊയിലാണ്ടി താലൂക്ക്: 0496-2620235, വടകര: 0496-2522361, താമരശ്ശേരി: 0495 2223088.