കുതിരക്കച്ചവടം സംബന്ധിച്ച കേസില്‍ സുപ്രിംകോടതിയുടെ വിധി ബി.ജെ.പിക്ക് അനുകൂലമായിരിക്കുമെന്നും മുഖ്യമന്ത്രി ഓഡിയോയില്‍ അവകാശപ്പെടുന്നുണ്ട്

ന്യൂഡല്‍ഹി: കര്‍ണാടകയില്‍ കോണ്‍ഗ്രസ്-ജെ.ഡി.എസ് സര്‍ക്കാരിനെ താഴെയിറക്കാന്‍ എല്ലാ നീക്കവും നടത്തിയത് കേന്ദ്ര ആഭ്യന്തരമന്ത്രിയും ബി.ജെ.പി അധ്യക്ഷനുമായ അമിത് ഷാ ആണെന്ന് വെളിപ്പെടുത്തുന്ന മുഖ്യമന്ത്രി ബി.എസ് യെദ്യൂരപ്പയുടെ വിഡിയോ ക്ലിപ് തെളിവായി സ്വീകരിക്കാനാവില്ലെന്ന് സുപ്രിംകോടതി. കോണ്‍ഗ്രസ് നേതാവും മുതിര്‍ന്ന അഭിഭാഷകനുമായ കപില്‍ സിബലാണ് ഇന്നലെ വിഷയം കോടതിയുടെ ശ്രദ്ധയില്‍പ്പെടുത്തിയത്.
കോടതി ഇക്കാര്യം പരിശോധിക്കാമെന്നു പറഞ്ഞ ജസ്റ്റിസ് എന്‍.വി രമണയുടെ ബെഞ്ച് കേസിലെ വാദങ്ങള്‍ക്കിടെ എല്ലാ പ്രസക്തമായ കാര്യങ്ങളും സമഗ്രമായി പരിശോധിച്ചിട്ടുണ്ടെന്നും കോടതി ചൂണ്ടിക്കാട്ടി.
കുമാരസ്വാമി സര്‍ക്കാരിന്റെ വിശ്വാസവോട്ടെടുപ്പിന് മുമ്പ് 17 കര്‍ണാടക എം.എല്‍.എമാരെ അയോഗ്യരാക്കിയത് ചോദ്യം ചെയ്ത് സമര്‍പ്പിച്ച ഹരജിയില്‍ വാദം പൂര്‍ത്തിയാക്കി സുപ്രിംകോടതി വിധി പുറപ്പെടുവിക്കാനിരിക്കുകയാണ്.
ഇതിനൊപ്പം കുതിരക്കച്ചവടത്തില്‍ അമിത്ഷാക്കു പങ്കുള്ളത് വ്യക്തമാക്കുന്ന യെദ്യൂരപ്പയുടെ വിഡിയോയും പരിഗണിക്കണമെന്നായിരുന്നു കോണ്‍ഗ്രസിന്റെ ആവശ്യം. കുതിരക്കച്ചവടം സംബന്ധിച്ച കേസില്‍ സുപ്രിംകോടതിയുടെ വിധി ബി.ജെ.പിക്ക് അനുകൂലമായിരിക്കുമെന്നും മുഖ്യമന്ത്രി ഓഡിയോയില്‍ അവകാശപ്പെടുന്നുണ്ട്.