വടക്കാഞ്ചേരി: റോഡില്‍ നിന്ന് വീണ് കിട്ടിയ പണവും സ്വര്‍ണാഭരണങ്ങളും ഉടമയ്ക്ക് തിരിച്ച് ലഭിയ്ക്കാന്‍ വഴിയൊരുക്കിയ സിവില്‍ പൊലിസ് ഓഫിസര്‍ക്ക് അഭിനന്ദന പ്രവാഹം.
തൃശൂര്‍ റൂറല്‍ ജില്ലാ പൊലിസ് കാര്യാലയത്തിലെ സിവില്‍ പൊലിസ് ഓഫിസറും, പുതുരുത്തി സ്വദേശിയുമായ സി.എസ് ശ്രീജിത്താണ് സത്യസന്ധതയുടെ മഹാ പ്രതീകമായത്. കഴിഞ്ഞ രാത്രിയില്‍ പുതുരുത്തി മങ്ങാട് റോഡില്‍ നിന്നാണ് 24,000 രൂപയും, സ്വര്‍ണാഭരണങ്ങള്‍, എ.ടി.എം കാര്‍ഡ്, മൊബൈല്‍ ഫോണ്‍, എന്നിവ ഉള്‍പ്പെടെയുള്ള വസ്തുക്കള്‍ ശ്രീജിത്തിന് ലഭിച്ചത്. തുടര്‍ന്ന് ഇത് വടക്കാഞ്ചേരി പൊലിസില്‍ ഏല്‍പ്പിക്കുകയായിരുന്നു . അഡിഷണല്‍ എസ്.ഐ ശശിധരന്റെ നേതൃത്വത്തില്‍ സാധന ഉടമയായ മുളങ്കുന്നത്തുകാവ് സ്വദേശിയും, ബിസിനസുകാരനുമായ ലിബീഷിനെ വിളിച്ച് വരുത്തുകയും , ശ്രീജിത്തിന്റെ സാന്നിധ്യത്തില്‍ പണവും, സ്വര്‍ണവും കൈമാറുകയും ചെയതു.