ആലപ്പുഴ: അരൂരില്‍ സി.പി.എം സ്ഥാനാര്‍ഥിയുടെ തോല്‍വിക്കുകാരണമായ മന്ത്രി ജി. സുധാകരന്റെ പൂതന പരാമര്‍ശത്തില്‍ മന്ത്രിയെ വളഞ്ഞിട്ട് ആക്രമിക്കുകയാണ് പാര്‍ട്ടിയിലെ തന്നെ ഒരു വിഭാഗം. ഇതിനെതിരേ പൊട്ടിത്തെറിച്ച് മന്ത്രി തന്നെ രംഗത്തെത്തി. ഇതിനു പിന്നില്‍ ചില രാഷ്ട്രീയ ക്രിമിനലുകളാണെന്നാണ് സുധാകരന്‍ ഇതിനോട് പ്രതികരിച്ചത്. ജില്ലാ കമ്മിറ്റിയില്‍ തനിക്കെതിരെ വിമര്‍ശനമുണ്ടായിട്ടില്ല. ഇത്തരത്തില്‍ വാര്‍ത്തകള്‍ ചമക്കുന്നത് ആലപ്പുഴയിലെ രാഷ്ട്രീയ ക്രിമിനലുകളാണ്. പ്രസ്ഥാനത്തെ ഒറ്റുന്ന ഇവരാരാണെന്ന് എല്ലാവര്‍ക്കുമറിയാം. സുധാകരന്‍ തുറന്നടിച്ചു. അരൂരിലെ തോല്‍വിക്കു കാരണം പൂതന പരാമര്‍ശമല്ല. യഥാര്‍ഥ കാരണം മറച്ചുവെക്കാനാണീ ഈ ആരോപണം ഉന്നയിക്കുന്നത്. യഥാര്‍ഥ കാരണമെന്താണെന്ന് പരിശോധിക്കണമെന്നും സുധാകരന്‍ ആവശ്യപ്പെട്ടു.