ചേര്‍ത്തല: നഗരത്തില്‍ തട്ടുകട ഉടമയെ വെട്ടിപരിക്കേല്‍പ്പിച്ചു. ചേര്‍ത്തല ചക്കരകുളം വിജയവിഹാറില്‍ സുനു(45)വാണ് കൈയ്ക്ക് വെട്ടേറ്റ് ചേര്‍ത്തല ഗവ.താലൂക്ക് ആശുപത്രിയില്‍ ചികില്‍സയിലുള്ളത്. അക്രമിയെ നാട്ടുകാര്‍ പിടികൂടി പൊലിസില്‍ ഏല്‍പ്പിച്ചു.
മുഹമ്മ കൊച്ചുവെളി ജിജിത്(38) ആണ് പിടിയിലായത്. ഇന്നലെ രാത്രിയായിരുന്നു ആക്രമണം. പരസ്യമദ്യപാനം സംബന്ധിച്ച് പൊലിസിന് വിവരം നല്‍കിയെന്നതിന്റെ പേരിലായിരുന്നു ആക്രമണം. മദ്യപിച്ച് ബഹളമുണ്ടാക്കിയതിന് കഴിഞ്ഞ ദിവസം പൊലിസ് ഇയാളെ പിടികൂടിയിരുന്നു.
ഇന്നലെ വടിവാളുമായി എത്തിയ പ്രതി സുനുവിനെ ആക്രമിക്കുകയായിരുന്നു. സമീപത്തെ മറ്റ് കച്ചവടക്കാരും നാട്ടുകാരും ഓടിയെത്തിയാണ് രക്ഷിച്ചത്. വധശ്രമത്തിന് കേസെടുത്തതായി പൊലിസ് അറിയിച്ചു.