ഡല്‍ഹി: 2019-20 വര്‍ഷത്തേക്കുള്ള ഐ ലീഗ് മത്സരങ്ങളുടെ ഫിക്‌സര്‍ പുറത്ത് വിട്ടു. നവംബര്‍ 30നാണ് മത്സരം ആരംഭിക്കുന്നത്. ഉദ്ഘാടന ദിവസം രണ്ട് മത്സരങ്ങളാണ് നടക്കുന്നത്.
ഐസ്വാള്‍ മോഹന്‍ ബഗാനുമായി ഏറ്റമുട്ടുമ്പോള്‍ അന്നേ ദിവസം തന്നെ ഗോകുലം കേരള നെരോക്ക എഫ്‌സിയുമായും കളിക്കും. നിലവിലെ ചാംപ്യന്‍മാരായ ചെന്നൈ സിറ്റിക്ക് രണ്ടാം ദിവസമാണ് കളിയുള്ളത്. മണിപ്പൂരില്‍നിന്ന് പുതുതായി സ്ഥാനക്കയറ്റം ലഭിച്ച ടിഡിയം റോഡ് അത്‌ലറ്റിക് ക്ലബ്ബുമായാണ് ചെന്നൈയുടെ മത്സരം. ഈസ്റ്റ് ബംഗാള്‍ റിയല്‍ കാശ്മിരുമായാണ് ആദ്യ മത്സരം കളിക്കുന്നത്. ഈസ്റ്റ് ബംഗാള്‍ സാള്‍ട്ട് ലേക്കില്‍ ഹോം മത്സരങ്ങള്‍ കളിക്കുമ്പോള്‍ കാശ്മിരി ടീം കാശ്മിരില്‍ തന്നെയാകും ഈ സീസണിലും ഹോം മത്സരങ്ങള്‍ക്കിറങ്ങുക. ഇത്തവണത്തെ ആദ്യ കൊല്‍ക്കത്ത ഡര്‍ബി ഡിസംബര്‍ 22ന് മോഗന്‍ ബഗാന്റെ മൈതാനത്താണ്. പുതിയ സീസണില്‍ മികച്ച പ്രതീക്ഷയോടെ ഇറങ്ങുന്ന ഗോകുലം ശക്തമായ ടീമിനേയാണ് ഇറക്കുന്നത്. ഡ്യൂറാന്റ് കപ്പിലും ഷൈഖ്കമാല്‍ കപ്പിലും മികച്ച പ്രകടനമായിരുന്നു ഗോകുലം കാഴ്ചവച്ചത്. പുതിയ സീസണില്‍ കാര്യമായ നേട്ടമുണ്ടാക്കാനുള്ള ഒരുക്കത്തിലാണ് ഗോകുലം.