ഗുരുവായൂര്‍: ചാവക്കാട് ഗവ: ഹയര്‍സെക്കന്‍ഡറി സ്‌കൂളിലെ മോഷണംപോയ അഞ്ച് ലാപ്‌ടോപ്പുകളില്‍ രണ്ടെണ്ണംകൂടി പൊലിസ് കണ്ടെടുത്തു. ഇതോടെ സ്‌കൂളില്‍നിന്ന് മോഷണം പോയ അഞ്ച് ലാപ്‌ടോപ്പുകളില്‍ മൂന്നെണ്ണം പൊലിസിന് ലഭിച്ചു.
കഴിഞ്ഞമാസം 27നാണ് സ്‌കൂളിലെ ലാപ്‌ടോപ്പുകള്‍ മോഷണംപോയത്. മോഷ്ടാക്കളായ ഗുരുവായൂര്‍ ഇരിങ്ങപ്പുറം ചക്കണ്ടന്‍ വീട്ടില്‍ മിട്ടുവെന്ന സ്‌നേഹജിത്ത് (18), ഗുരുവായൂര്‍ നെന്മിനി തട്ടുപറമ്പില്‍വീട്ടില്‍ നിതീഷ് (18) എന്നിവരെ ഗുരുവായൂര്‍ ടെമ്പിള്‍ പൊലിസ് രണ്ടുദിവസങ്ങളിലായി രണ്ടിടങ്ങളില്‍ നിന്നുമാണ് പിടികൂടിയത്. കോടതിയില്‍ ഹാജറാക്കി റിമാന്റ് ചെയ്ത പ്രതികളെ കസ്റ്റഡിയില്‍വാങ്ങി നടത്തിയ അന്വേഷണത്തിലാണ് മോഷ്ടിച്ച മൂന്ന് ലാപ്‌ടോപ്പുകള്‍ പൊലിസ് കണ്ടെടുത്തത്. മോഷണം നടന്ന് ഒരാഴ്ച്ചക്കിടെ വില്‍പ്പന നടത്താന്‍ ശ്രമം നടത്തവേയാണ്, രണ്ടാംപ്രതി നിതീഷിനെ ആദ്യം പൊലിസ് പിടികൂടിയത്. നിതീഷ് പറഞ്ഞതനുസരിച്ചാണ് നിതീഷിന്റെ വീടിന് സമീപത്തുള്ള വീടിന്റെ മേല്‍ക്കൂരക്കുമുകളില്‍ സൂക്ഷിച്ചിരുന്ന ഒരു ലാപ്‌ടോപ്പ് പൊലിസ് കണ്ടെടുത്തത്. കഴിഞ്ഞദിവസം ഒന്നാം പ്രതി മിട്ടുവെന്ന സ്‌നേഹജിത്തിനേയും കൂടി പൊലിസ് പിടികൂടി കോടതിയില്‍ ഹാജറാക്കി റിമാന്റ് ചെയ്തിരുന്നു. റിമാന്റിലായിരുന്ന സ്‌നേഹജിത്തിനെ കസ്റ്റഡിയില്‍വാങ്ങി നടത്തിയ അന്വേഷണത്തിലാണ് ഇയാളുടെ ജ്യേഷ്ഠസഹോദരന്റെ മുല്ലശ്ശേരിയിലുള്ള വീട്ടില്‍ സൂക്ഷിച്ചിരുന്ന രണ്ട് ലാപ്‌ടോപ്പുകള്‍ കൂടി പൊലിസ് കണ്ടെടുത്തത്.