കടയ്ക്കല്‍: ചിതറയില്‍ വീട്ടില്‍ അതിക്രമിച്ചുകയറി സ്ത്രീയെയും യുവാവിനെയും മരത്തില്‍ കെട്ടിയിട്ട് മര്‍ദിച്ച സംഭവത്തില്‍ മൂന്നുപേര്‍ റിമാന്‍ഡില്‍.
ചിതറ സ്വദേശികളായ സബീര്‍, ഇര്‍ഷാദ്, മുനീര്‍ എന്നിവരെയാണ് കടയ്ക്കല്‍ സി.ഐയുടെ നേതൃത്വത്തിലുള്ള പൊലിസ് സംഘം കഴിഞ്ഞദിവസം അറസ്റ്റ് ചെയ്തത്. കേസിലെ മറ്റു പ്രതികള്‍ക്കായി തിരച്ചില്‍ തുടരുകയാണ്.
ഇക്കഴിഞ്ഞ 12നാണ് 43 വയസുള്ള സ്ത്രീയെയും മകന്റെ സുഹൃത്തിനെയും ഒരു സംഘം സദാചാരഗുണ്ടകള്‍ മരത്തില്‍ കെട്ടിയിട്ട് മര്‍ദിക്കുകയും വസ്ത്രം അഴിക്കാന്‍ ശ്രമിക്കുകയും ദൃശ്യങ്ങള്‍ പ്രചരിപ്പിക്കുകയും ചെയ്തത്.
സ്ത്രീയുടെ പരാതിയില്‍ പൊലിസിന്റെ ഭാഗത്ത് നിന്ന് നടപടിയൊന്നും ഉണ്ടാകാത്തതിനെത്തുടര്‍ന് പ്രതിഷേധം ശക്തമായ സാഹചര്യത്തിലാണ് പ്രതികളെ പൊലിസ് പിടികൂടുന്നത്. പിടിയിലായ മൂന്നുപേരെയും പൊലിസ് നേരത്തെ യുവാവിന്റെ പരാതിയില്‍ അറസ്റ്റ് ചെയ്ത ശേഷം ജാമ്യത്തില്‍ വിട്ടതാണ്. കടയ്ക്കല്‍ കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.