കണ്ണൂര്‍: യുവജനയാത്രയുടെ പ്രചാരണ പ്രവര്‍ത്തനത്തിനിടെ കഴിഞ്ഞ ദിവസം അപകടത്തില്‍പ്പെട്ട് മരിച്ച തലശ്ശേരി മണ്ഡലം എം.എസ്.എഫ് പ്രസിഡന്റ് ആശിഫ് മട്ടാമ്പ്രത്തിന്റെ വിയോഗം യൂത്ത് ലീഗിന് തീരാനഷ്ട്ടമാണെന്ന് ജില്ലാ മുസ്‌ലിം യൂത്ത് ലീഗ് അനുശോചന കുറിപ്പില്‍ അറിയിച്ചു. യുവജന യാത്രയുടെ വിജയത്തിനു വേണ്ടി കഠിന പ്രയത്‌നത്തിലായിരുന്നു ആശിഫ്. തലശ്ശേരി മണ്ഡലത്തില്‍ വൈറ്റ് ഗാര്‍ഡിന്റെ ചുമതല ആശിഫിനായിരുന്നു. കഴിഞ്ഞദിവസം ആശിഫിന്റെ നേതൃത്വത്തില്‍ തലശ്ശേരിയില്‍ എം.എസ്.എഫ് വിളംബര ജാഥ സംഘടിപ്പിച്ചിരുന്നു. യുവജനയാത്ര തലശ്ശേരിയില്‍ ചരിത്രവിജയമാക്കുന്നതിനു വേണ്ടി കഴിഞ്ഞ കുറച്ച് ദിവസമായി ആശിഫും സഹപ്രവര്‍ത്തകരും രാവുംപകലും കഠിനാധ്വാനത്തിലായിരുന്നു. ആശിഫിന്റെ വിയോഗം എല്ലാവരെയും ദുഃഖത്തിലാഴ്ത്തിയിരിക്കുന്നു. മാതൃകാപരമായ ആശിഫിന്റെ പ്രവര്‍ത്തനം മങ്ങാതെ എന്നും നിലനില്‍ക്കുമെന്നും യൂത്ത്‌ലീഗ് ജില്ലാ കമ്മിറ്റി പറഞ്ഞു. അനുശോചനം രേഖപ്പെടുത്തി ജില്ലാ യൂത്ത് ലീഗ് പ്രസിഡന്റ് പി.വി ഇബ്രാഹിം, ജനറല്‍ സെക്രട്ടറി സമീര്‍ പറമ്പത്ത്, ട്രഷറര്‍ മുസ്‌ലിഹ് മഠത്തില്‍, ഭാരവാഹികളായ ഷക്കീര്‍ മൗവ്വഞ്ചേരി, കെ.എം ഷംസുദ്ദീന്‍, സി.കെ മുഹമ്മദലി, സി.പി റഷീദ് തുടങ്ങിയവര്‍ ആശുപത്രിയിലും വസതിയിലും സന്ദര്‍ശനം നടത്തി.