ശ്രീകണ്ഠപുരം: കഞ്ചാവ് ഉപയോഗിച്ച് പ്രത്യേകരൂപത്തില്‍ കേക്ക് ഉണ്ടാക്കി കല്യാണ വീടുകളില്‍ വിതരണം ചെയ്യുന്നയാളെ എക്‌സൈസ് സംഘം പിടികൂടി. തേര്‍ത്തല്ലിയിലെ നന്ത്യാപറമ്പില്‍ ആകാശ് എന്ന ബേബി (25) യെയാണ് അസി. എക്‌സൈസ് ഇന്‍സ്‌പെക്ടര്‍ വി.കെ മണികണ്ഠനും സംഘവും പയ്യാവൂരില്‍വച്ച് പിടികൂടിയത്.
ബൈക്കില്‍ സഞ്ചരിച്ച് വിദ്യാര്‍ഥികള്‍ക്കും മറ്റും വിതരണം ചെയ്യുകയാണ് ഇയാളുടെ രീതി. ഓണ്‍ലൈന്‍ വഴി ബുക്കിങ് നടത്തി കല്യാണവീടുകളില്‍ കഞ്ചാവ് കേക്ക് രൂപത്തില്‍ ഉണ്ടാക്കിയും ഇയാള്‍ വിതരണം ചെയ്യാറുണ്ടത്രെ. ബംഗളൂരുവില്‍ വിദ്യാര്‍ഥിയാണ് ആകാശ്. അന്‍പത് ഗ്രാം കഞ്ചാവും ബൈക്കും പിടിച്ചെടുത്തു. ആലക്കോട് മേഖലയില്‍ കഞ്ചാവ് എത്തിക്കുന്ന പ്രധാന കണ്ണിയാണിയാണെന്ന് ഉദ്യോസ്ഥര്‍ പറഞ്ഞു. പ്രിവന്റിവ് ഓഫിസര്‍ പി.ടി യേശുദാസ്, സി.ഇ.ഒമാരായ എം.വി അശ്രഫ്, ഉല്ലാസ് ജോസ്, ലതീഫ് സംഘത്തിലുണ്ടായിരുന്നു.