തിരുവനന്തപുരം: ഡോ. രാജന്‍ ഗുരുക്കള്‍ കമ്മിഷന്റെ ശുപാര്‍ശകളുടെ അടിസ്ഥാനത്തില്‍ ഉന്നത വിദ്യാഭ്യാസ കൗണ്‍സില്‍ പുനഃസംഘടിപ്പിക്കാന്‍ നിയമം ഭേദഗതി ചെയ്യും. ഇതിനുള്ള കേരള സംസ്ഥാന ഉന്നത വിദ്യാഭ്യാസ കൗണ്‍സില്‍ ആക്ട് (2007) ഭേദഗതി ഓര്‍ഡിനന്‍സായി പുറപ്പെടുവിക്കാന്‍ മന്ത്രിസഭ ഗവര്‍ണറോടു ശുപാര്‍ശ ചെയ്തു.
ഭേദഗതിയനുസരിച്ച് ഉന്നത വിദ്യാഭ്യാസ കൗണ്‍സിലിന്റെ കീഴില്‍ ഇനി ഉപദേശക കൗണ്‍സിലുകള്‍ക്കു പകരം ഉപദേശക ബോഡികള്‍ വരും. കേന്ദ്ര സര്‍ക്കാരിന്റെ മാനവ വിഭവ വികസന മന്ത്രാലയത്തിന് കീഴിലുള്ള ഉച്ഛതര്‍ ശിക്ഷാ അഭിയാന്റെ (റൂസ) മാര്‍ഗനിര്‍ദേശങ്ങള്‍ കൂടി കണക്കിലെടുത്താണ് ഭേദഗതികള്‍ നിര്‍ദേശിച്ചത്.