തളിപ്പറമ്പ്: രണ്ടുമാസം മുന്‍പ് തളിപ്പറമ്പില്‍നിന്ന് ഓട്ടോറിക്ഷ മോഷ്ടിച്ച സംഭവത്തില്‍ പ്രതി അറസ്റ്റില്‍. വിളയാങ്കോട് സ്വദേശിയും ഇരിക്കൂറില്‍ താമസക്കാരനുമായ ചേക്കാട് വീട്ടില്‍ ഷംസീര്‍(36) ആണ് അറസ്റ്റിലായത്. തളിപ്പറമ്പ് പൂക്കോത്ത് തെരുവിലെ ശ്രീകാന്തിന്റെ വീട്ടുമുറ്റത്ത് നിര്‍ത്തിയിട്ട ഗുഡ്‌സ് ഓട്ടോറിക്ഷയാണ് കഴിഞ്ഞ സെപ്റ്റംബര്‍ 17 ന് രാത്രി മോഷ്ടിച്ചത്. ഓട്ടോറിക്ഷ ഇരിട്ടിയില്‍ പൊളിച്ചുവില്‍ക്കാനായി എത്തിച്ചിരിക്കുകയായിരുന്നു.
തളിപ്പറമ്പ് ഡിവൈ.എസ്.പി കെ.വി വേണുഗോപാലിന്റെ നിര്‍ദേശപ്രകാരം എസ്.ഐ കെ.കെ പ്രശോഭ് ശനിയാഴ്ച രാവിലെ തളിപ്പറമ്പ് ബസ് സ്റ്റാന്‍ഡില്‍നിന്നാണ് പ്രതിയെ പിടികൂടിയത്. തളിപ്പറമ്പ് പൊലിസ് പ്രതിയുമായി ഇരിട്ടിയിലെത്തി ഓട്ടോറിക്ഷ കസ്റ്റഡിയിലെടുത്തു. കോടതിയില്‍ ഹാജരാക്കിയ ഷംസീറിനെ റിമാന്‍ഡ് ചെയ്തു.