കോഴിക്കോട്: കേരള ഭാഷാ ഇന്‍സ്റ്റിറ്റ്യൂട്ടിന്റെ ആറു ദിവസം നീണ്ടുനില്‍ക്കുന്ന പുസ്തകോത്സവത്തിനു നാളെ കോഴിക്കോട് പൊലിസ്‌ക്ലബ് ഹാളില്‍ തുടക്കമാവും. വൈകിട്ടു നാലിന് പുരുഷന്‍ കടലുണ്ടി എം.എല്‍.എ ഉദ്ഘാടനം ചെയ്യും. ഭാഷാ ഇന്‍സ്റ്റിറ്റ്യൂട്ട് ഡയരക്ടര്‍ പ്രൊഫ. വി. കാര്‍ത്തികേയന്‍ നായര്‍ അധ്യക്ഷനാകും.
ചടങ്ങില്‍ 'ആരോഗ്യ വിവര സാങ്കേതികവിദ്യ' എന്ന പുസ്തകം കോഴിക്കോട് മെഡിക്കല്‍ കോളജ് പ്രിന്‍സിപ്പല്‍ ഡോ. വി.പി ശശിധരന്‍ ബേബി മെമ്മോറിയല്‍ ആശുപത്രി എം.ഡി ഡോ. കെ.ജി അലക്‌സാണ്ടറിനു നല്‍കി പ്രകാശനം ചെയ്യും. ഡോ. കെ.പി മോഹനന്‍ ആശംസകളര്‍പ്പിക്കും. ഭാഷാ ഇന്‍സ്റ്റിറ്റ്യൂട്ട് റിസര്‍ച്ച് ഓഫിസര്‍ സി. അശോകന്‍ പുസ്തക പരിചയം നടത്തും.
13 വരെ നീണ്ടുനില്‍ക്കുന്ന പുസ്തകോത്സവത്തില്‍ നാലായിരത്തിലേറെ ശീര്‍ഷകങ്ങളിലുള്ള പുസ്തകങ്ങള്‍ ഉള്‍പ്പെടുത്തിയിട്ടുണ്ട്. രാവിലെ 9.30 മുതല്‍ വൈകിട്ട് ഏഴുവരെ നടക്കുന്ന മേളയില്‍ 20 മുതല്‍ 60 വരെ ശതമാനം വിലക്കിഴിവില്‍ പുസ്തകങ്ങള്‍ ലഭ്യമാവും.