തിരുവനന്തപുരം: മികച്ച സര്‍വകലാശാലക്കുള്ള നാലാമത് ചാന്‍സലേഴ്‌സ് അവാര്‍ഡ് കോട്ടയം മഹാത്മാഗാന്ധി സര്‍വകലാശാലയ്ക്ക്. മികച്ച എമര്‍ജിങ് യൂനിവേഴ്‌സിറ്റിക്കുള്ള പുരസ്‌കാരം വയനാട് കേരള വെറ്ററിനറി ആന്‍ഡ് അനിമല്‍ ഹസ്ബന്ററി സര്‍വകലാശാലയ്ക്കും ലഭിക്കും.
ഉന്നത വിദ്യാഭ്യാസ കൗണ്‍സില്‍ വൈസ് ചെയര്‍മാന്‍ പ്രൊഫ.രാജന്‍ ഗുരുക്കള്‍ അധ്യക്ഷനായ സെലക്ഷന്‍ കമ്മിറ്റി സമര്‍പ്പിച്ച ശുപാര്‍ശ ചാന്‍സലര്‍ കൂടിയായ ഗവര്‍ണര്‍ പി. സദാശിവം അംഗീകരിച്ചു. ചാന്‍സലേഴ്‌സ് അവാര്‍ഡിന് അഞ്ചുകോടി രൂപയാണ് സമ്മാനത്തുക. എമര്‍ജിങ് യൂനിവേഴ്‌സിറ്റിക്ക് ഒരു കോടി രൂപ സമ്മാനമായി ലഭിക്കും. ഇരുസര്‍വകലാശാലകള്‍ക്കും ഇത് രണ്ടാംതവണയാണ് പുരസ്‌കാരം ലഭിക്കുന്നത്.