നിലമ്പൂര്‍: സമുദ്രനിരപ്പില്‍നിന്ന് 1,800 അടി ഉയരത്തിലുള്ള അകമ്പാടം ഇടിവണ്ണയിലെ കരിമ്പായി കോട്ടപാറ മുകളില്‍ കയറിയ ആദിവാസി യുവാവ് മണിക്കൂറോളം പരിഭ്രാന്തി പരത്തി. പാറേക്കാട് കോളനിയിലെ 25 വയസുള്ള യുവാവാണ് വഴുവഴുപ്പും അപകടസാധ്യതയേറെയുമുള്ള പാറയുടെ ഏറ്റവും മുകളില്‍ കയറി അക്രമാസക്തനായത്.
ഇയാള്‍ മാനസികരോഗിയാണെന്നു പറയപ്പെടുന്നു. താഴെയിറക്കാന്‍ ശ്രമിച്ചവരെ ഇയാള്‍ കല്ലെറിഞ്ഞ് ഓടിക്കുകയും ചെയ്തു. പുലര്‍ച്ചെയാണ് സംഭവം. കുറേ സമയം പാറയുടെ മുകളില്‍ യുവാവ് അക്രമാസക്തനായതു ശ്രദ്ധയില്‍പെട്ട നാട്ടുകാര്‍ പൊലിസിനെ വിവരമറിയിക്കുകയായിരുന്നു. നാട്ടുകാരില്‍ ചിലരും പൊലിസും സന്ദര്‍ശകരെന്ന മട്ടില്‍ പതിയെ മുകളിലെത്തി ഇയാളെ തന്ത്രപൂര്‍വം വളഞ്ഞുപിടിക്കുകയായിരുന്നു.