മെല്‍ബണ്‍: ഇന്ത്യയും ആസ്‌ത്രേലിയയും തമ്മിലുള്ള മൂന്നാം ടി20 ഇന്ന് ഉച്ചക്ക് 1.30ന്. പരമ്പരയിലെ രണ്ടാം മത്സരം മഴകാരണം ഉപേക്ഷിക്കേണ്ടി വന്നതിനാല്‍ ഇന്നത്തെ മത്സരത്തില്‍ ഇന്ത്യക്ക് ജയിച്ചേ തീരൂ എന്ന അവസ്ഥയാണ്.
മൂന്ന് പരമ്പരകളുള്ള മത്സരത്തില്‍ ആസ്‌ത്രേലിയ 1-0ത്തിന് മുന്നിലാണ്. ആദ്യ മത്സരത്തില്‍ ആസ്‌ത്രേലിയ ഇന്ത്യയെ നാല് റണ്‍സിന് പരാജയപ്പെടുത്തിയിരുന്നു. രണ്ടാം മത്സരത്തില്‍ നീലപ്പട ജയത്തിലേക്ക് അടുത്തിരുന്നെങ്കിലും ശക്തമായ മഴകാരണം മത്സരം ഉപേക്ഷിക്കുകയായിരുന്നു. മഴ ഇല്ലെങ്കില്‍ ഇന്നത്തെ മത്സരം കൈപ്പിടിയിലൊതുക്കാമെന്ന വിശ്വാസത്തില്‍ തന്നെയാണ് കോഹ്‌ലിയും സംഘവും.
ആസ്‌ത്രേലിയയില്‍ ഇന്നും മഴപെയ്യുകയാണെങ്കില്‍ ഇന്ത്യയുടെ കളി അവതാളത്തിലായേക്കും. ആദ്യ മത്സരത്തിലും മഴകാരണം ഡക്ക് വര്‍ത്ത് ലൂയിസ് നിയമപ്രകാരം ലക്ഷ്യം പുതുക്കി നിശ്ചയിച്ചതോടെയാണ് ഇന്ത്യ പരാജയം രുചിച്ചത്.