വടക്കാഞ്ചേരി: മുളങ്കുന്നത്ത് കാവ് മെഡിക്കല്‍ കോളജില്‍ കുട്ടിയുടെ ചികിത്സയ്‌ക്കെത്തി നാലു സ്‌കൂട്ടറുകളും മൂന്നു ടിവിയും മോഷ്ടിച്ച കേസില്‍ ദമ്പതികള്‍ പൊലിസ് പിടിയിലായി. പാലക്കാട് ആലത്തൂര്‍ മണലാഴിക്കുഴി വീട്ടില്‍ ഗോവിന്ദ രാജ് (രാജന്‍ - 43), ഭാര്യ ശാന്തിമോള്‍ (ശാന്തി - 27) എന്നിവരെയാണ് മെഡിക്കല്‍ കോളജ് എസ്.ഐ അരുണ്‍ ഷായുടെ നേതൃത്വത്തിലുള്ള പൊലിസ് സംഘം അറസ്റ്റു ചെയ്തത്.
കഴിഞ്ഞ ജൂലൈ മാസത്തിലായിരുന്നു ദമ്പതികളുടെ മോഷണ പരമ്പര. ചെമ്മനാട് സ്വദേശി മുഹമ്മദ് അഫ്‌സല്‍, ചൂലിശ്ശേരി സ്വദേശിനി ലിംസി എന്നിവരുടെ സ്‌കൂട്ടറുകള്‍, കോഴിക്കോട് സ്വദേശി അഖില്‍, പാലക്കാട് കൊടുവായൂര്‍ സ്വദേശി ബിജു എന്നിവരുടെ മോട്ടോര്‍ ബൈക്കുകള്‍, ആശുപത്രിയിലെ സര്‍ജിക്കല്‍, മെഡിസിന്‍, ഓര്‍ത്തോ ഒ.പി കൗണ്ടറുകളിലെ ടിവികള്‍ എന്നിവയാണു കവര്‍ന്നത്. ടി.വികള്‍ പ്രതികളുടെ വീട്ടില്‍ നിന്നും മെഡിക്കല്‍ കോളജ് ഫാര്‍മസിക്കുള്ളില്‍ നിന്നും കണ്ടെത്തി.
വാഹനങ്ങള്‍ പ്രതികളുടെ വീട്ടുപരിസരത്തു നിന്നും കണ്ടെടുത്തു. ഭാര്യയുടെ പ്രേരണയും ഒത്താശയും ആശുപത്രിയിലെ സുരക്ഷാ ജീവനക്കാരുടെ വീഴ്ച്ചയുമാണു വന്‍ മോഷണത്തിനു സഹായകരമായതെന്നു പൊലിസ് അറിയിച്ചു. കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു.