തിരുവനന്തപുരം: ബി.ജെ.പി സര്‍ക്കാരിന്റെ ഭരണംമൂലം സാമ്പത്തിക രംഗത്തും മറ്റു പ്രധാനപ്പെട്ട മേഖലകളിലും ഉണ്ടായ വന്‍തകര്‍ച്ചക്കെതിരേ കോണ്‍ഗ്രസ് നടത്തുന്ന ദേശവ്യാപക പ്രക്ഷോഭം ഡല്‍ഹിയില്‍ പടുകൂറ്റന്‍ റാലിയോടെ ഈ മാസം 15ന് സമാപിക്കുമെന്ന് പ്രവര്‍ത്തക സമിതി അംഗം എ.കെ ആന്റണി വാര്‍ത്താസമ്മേളനത്തില്‍ പറഞ്ഞു. ഈ മാസം അഞ്ചിന് ദേശീയ തലത്തില്‍ ആരംഭിച്ച സമരപരിപാടികള്‍ 15നാണ് അവസാനിക്കുന്നത്. ഓരോ സംസ്ഥാനങ്ങളിലും സമരം നടത്തേണ്ട തിയതി അതാത് സംസ്ഥാനങ്ങളിലെ കമ്മിറ്റികള്‍ തീരുമാനിക്കും. മറ്റു പ്രതിപക്ഷ കക്ഷികളുടെ സഹകരണത്തോടെ കൂട്ടായ പരിപാടികള്‍ക്ക് കോണ്‍ഗ്രസ് നേതൃത്വം നല്‍കുമെന്നും അദ്ദേഹം കൂട്ടിച്ചേര്‍ത്തു.
നിത്യോപയോഗസാധനങ്ങളുടെ വില കുതിച്ചുയര്‍ന്നു. ഉള്ളിയുടെ വില നൂറു രൂപവരെയെത്തിയിരിക്കുന്നു. ഗ്രാമീണ സമ്പദ്ഘടനയും കാര്‍ഷിക സമ്പദ്ഘടനയും പൂര്‍ണമായ തകര്‍ച്ചയിലാണ്. തൊഴിലില്ലായ്മ പെരുകിയെന്നു മാത്രമല്ല, സ്വകാര്യമേഖലയില്‍ നിലവിലുള്ള തൊഴിലുകളും വ്യാപകമായി നഷ്ടപ്പെട്ടുകൊണ്ടിരിക്കുന്നു. ബാങ്കുകളുടെ കിട്ടാക്കടം എട്ട് ലക്ഷം കോടി കവിഞ്ഞു. അഞ്ചുവര്‍ഷത്തെ ബി.ജെ.പി ഭരണത്തിനിടയില്‍ 25,000 ലധികം ബാങ്ക് തട്ടിപ്പുകള്‍ ഉണ്ടായി. വിമാനത്താവളങ്ങള്‍, റെയില്‍വേ സ്റ്റേഷനുകള്‍ തുടങ്ങി തന്ത്രപ്രധാന പ്രതിരോധ വ്യവസായശാലകള്‍വരെ വിറ്റുതുലയ്ക്കുന്നു.
റിസര്‍വ് ബാങ്ക് യുദ്ധം പോലുള്ള അടിയന്തര ആവശ്യങ്ങളിലേക്കു മാറ്റിവച്ചിട്ടുള്ള കരുതല്‍ ധനം കേന്ദ്രസര്‍ക്കാര്‍ നിര്‍ബന്ധിച്ചു പിടിച്ചുവാങ്ങുകയാണ്. കാര്‍ഷികമേഖല വന്‍ തകര്‍ച്ച നേരിടുന്നു. കര്‍ഷക ആത്മഹത്യകള്‍ ഭയാനകമായ രീതിയില്‍ ഉയരുകയാണ്. ഈ രീതിയില്‍ മുന്നോട്ടുപോയാല്‍ രാജ്യത്ത് കര്‍ഷക ആത്മഹത്യ പലമടങ്ങാകും - ആന്റണി പറഞ്ഞു.
ഇത്തരത്തില്‍ രാജ്യത്തെ തകര്‍ച്ചയിലേക്കു തള്ളിവിട്ട ബി.ജെ.പി സര്‍ക്കാരിന്റെ തെറ്റായ സാമ്പത്തിക നയത്തിനെതിരേ കോണ്‍ഗ്രസ് ദീര്‍ഘമായ പോരാട്ടത്തിനു തയാറാണ്. അതിന്റെ ആദ്യഘട്ടമാണ് ഇപ്പോഴത്തെ പ്രക്ഷോഭ പരിപാടികള്‍.
ബി.ജെ.പി സര്‍ക്കാരിന്റെ തെറ്റായ നയങ്ങള്‍ മൂലം തൊഴിലില്ലായ്മ പെരുകുകയും ജനങ്ങള്‍ പട്ടിണിയിലേക്ക് വലിച്ചെറിയപ്പെടുകയും ചെയ്യുന്ന അവസ്ഥക്കെതിരേ ജനകോടികള്‍ക്ക് ആശ്വാസവും സംരക്ഷണവും നല്‍കുമെന്നും അവര്‍ക്കുവേണ്ടി ഏതറ്റംവരെ പോകാനും പ്രക്ഷോഭ പരിപാടികള്‍ സംഘടിപ്പിക്കാനും കോണ്‍ഗ്രസ് ഉണ്ടായിരിക്കുമെന്നും എ.കെ ആന്റണി പറഞ്ഞു.