പാലക്കാട്: അട്ടപ്പാടി മഞ്ചിക്കണ്ടിയിലുണ്ടായ പൊലസ് വെടിവെപ്പിനിടെ രക്ഷപ്പെട്ട മാവോയിസ്റ്റ് പിടിയിലായതായി റിപ്പോര്‍ട്ട്. ദീപക് എന്ന ചന്ദുവിനെയാണ് തമിഴ്‌നാട് ടാസ്‌ക് ഫോഴ്‌സ് പിടികൂടിയത്. ഇയാള്‍ക്കൊപ്പം മറ്റൊരാളെയും പിടിയിലായതായാണ് റിപ്പോര്‍ട്ട്.

മാവോയിസ്റ്റ് സംഘത്തിലുണ്ടായിരുന്ന ദീപകിനെ ആനക്കട്ടിക്ക് അടുത്ത് നിന്നാണ് ടാസ്‌ക് ഫോഴ്‌സ് പിടികൂടിയത്.കൂടുതല്‍ വിവരങ്ങള്‍ അറിവായിട്ടില്ല.

മഞ്ചിക്കണ്ടി ഏറ്റുമുട്ടലില്‍ പരുക്കുകളോടെ രക്ഷപ്പെട്ടവരെ കണ്ടെത്താന്‍ സാധിക്കാത്തതിനെതിരേ വിമര്‍ശനമുണ്ടായിരുന്നു. രണ്ടുപേര്‍ പരുക്കുകളോടെ രക്ഷപ്പെട്ടെന്നായിരുന്നു പൊലിസ് വിശദീകരിച്ചിരുന്നത്. ആറ് പേരടങ്ങുന്ന മാവോയിസ്റ്റ് സംഘം കഴിഞ്ഞ മാസം 28ന് തണ്ടര്‍ ബോള്‍ട്ട് സംഘത്തിന് നേരെ വെടിയുതിര്‍ത്തെന്നായിരുന്നു പൊലിസ് നല്‍കിയ വിശദീകരണം. ഇതില്‍ മൂന്നുപേര്‍ ആദ്യ ദിനവും ഒരാള്‍ രണ്ടാം ദിവസവും കൊല്ലപ്പെട്ടു. ആയുധധാരികളായ രണ്ടുപേര്‍ ഉള്‍വനത്തിലുണ്ടെന്നായിരുന്നു പൊലിസ് നിഗമനം. ഇതിന്റെ അടിസ്ഥാനത്തില്‍ മഞ്ചിക്കണ്ടി ഉള്‍വനത്തില്‍ ഡ്രോണ്‍ ഉള്‍പ്പെടെയുളള ആധുനിക തെരച്ചില്‍ സംവിധാനമുപയോഗിച്ച് പരിശോധനകള്‍ നടത്തിയിരുന്നുവെങ്കിലും കണ്ടെത്തിയിരുന്നില്ല.