തിരുവനന്തപുരം: ഒരു നേതാവില്‍ നിന്ന് ഉണ്ടാവാന്‍ പാടില്ലാത്ത നടപടിയാണ് പി.കെ ശശിയില്‍ നിന്നുണ്ടായതെന്ന് അന്വേഷണകമ്മിഷന്‍ അംഗം പി.കെ ശ്രീമതി.

സംഭവത്തില്‍ പി.കെ ശശിയ്ക്ക് വീഴ്ച്ച പറ്റി. യുവതിയുമായുള്ള സംഭാഷണത്തില്‍ പാര്‍ട്ടിയ്ക്ക് അംഗീകരിക്കാന്‍ കഴിയാത്ത തരത്തിലുള്ള പ്രയോഗങ്ങളുണ്ടായിട്ടുണ്ട്. അതൊട്ടും ശരിയായില്ല. പാര്‍ട്ടി നേതാവിന് യോജിക്കാത്ത തരത്തില്‍ പി.കെ ശശി സംസാരിച്ചുവെന്നും ശ്രീമതി പറഞ്ഞു.

പാലക്കാട്ടെ വിഭാഗീയത വിഷയമായില്ല. തെറ്റുതിരുത്തിക്കുകയാണ് വേണ്ടത്, പുറത്തുകളയുകയല്ല. പരാതിയില്‍ വലിയ പരിശോധന നടന്നു, ചില വീഴ്ച്ചകള്‍ കണ്ടെത്തിയെന്നും പി.കെ ശ്രീമതി കൂട്ടിച്ചേര്‍ത്തു.

അതേസമയം, നടപടിയില്‍ പൂര്‍ണതൃപ്തിയുണ്ടെന്ന് പരാതിക്കാരിയായ യുവതി പ്രതികരിച്ചു.