സ്വന്തം ലേഖകന്‍
ന്യൂഡല്‍ഹി: ബാബരി ഭൂമി ഹിന്ദുക്കള്‍ക്ക് വിട്ടുനല്‍കാന്‍ സുപ്രിംകോടതി പ്രധാനമായും ആശ്രയിച്ചത് ഒഴിഞ്ഞ ഭൂമിയിലല്ല ബാബരി പള്ളി നിര്‍മിച്ചതെന്ന പുരാവസ്തു വകുപ്പിന്റെ കണ്ടെത്തലിനെ.
പള്ളിക്ക് താഴെ മറ്റൊരു കെട്ടിടത്തിന്റെ അവശിഷ്ടങ്ങള്‍ പരിശോധനയില്‍ കണ്ടെത്തിയിരുന്നു. ഇത് മുസ്‌ലിം ആരാധനാലയമല്ലെന്ന പുരാവസ്തു വകുപ്പിന്റെ വാദം പൂര്‍ണമായും തള്ളേണ്ടതില്ലെന്നാണ് കോടതി നിലപാട്. ചരിത്രകാരന്‍മാരും ബുദ്ധിജീവികളും ചോദ്യംചെയ്യുന്നതാണ് ഇതുസംബന്ധിച്ച് 2003ല്‍ പുരാവസ്തു വകുപ്പ് സമര്‍പ്പിച്ച റിപ്പോര്‍ട്ട്. സുര്‍ക്കിയും ചുണ്ണാമ്പും കൊണ്ടുള്ള കെട്ടിടത്തിന്റെ അവശിഷ്ടങ്ങളായിരുന്നുവത്രേ പുരാവസ്തു വകുപ്പ് ബാബരി മസ്ജിദിനടിയില്‍ നടത്തിയ ഖനനത്തില്‍ കണ്ടെത്തിയത്.
നാലു തൂണുകളെ അടിസ്ഥാനപ്പെടുത്തിയുള്ള നിര്‍മ്മാണ രീതിയായിരുന്നു ഉപയോഗിച്ചതെന്നാണ് മറ്റൊന്ന്. ഇത് ക്ഷേത്ര നിര്‍മാണ രീതിയാണെന്ന വസ്തുതയ്ക്ക് നിരക്കാത്ത നിഗമനത്തിലെത്തുകയായിരുന്നു പുരാവസ്തു വകുപ്പ്. എന്നാല്‍, ചരിത്രകാരന്‍മാരായ റൊമീലാ ഥാപ്പര്‍, ഇര്‍ഫാന്‍ ഹബീബ് തുടങ്ങിയവര്‍ ഈ നിഗമനത്തെ ചോദ്യംചെയ്തിരുന്നു.
സുര്‍ക്കിയും ചുണ്ണാമ്പും ഉപയോഗിച്ചുള്ള നിര്‍മാണ രീതി ഇന്ത്യയിലേക്ക് കൊണ്ടുവന്നത് തന്നെ മുസ്‌ലിംകളാണ്. തൂണുകളെ അടിസ്ഥാനപ്പെടുത്തിയുള്ള നിര്‍മാണങ്ങള്‍ മുസ്‌ലിം ഭരണകാലത്തും നിലനിന്നിരുന്നു.
അതേസമയം, ക്ഷേത്രത്തിന്റെ അവശിഷ്ടമെന്നവകാശപ്പെടുന്ന കല്ലുകളിലെ ലിഖിതങ്ങള്‍ എന്തായിരുന്നുവെന്ന് പുരാവസ്തു വകുപ്പ് വെളിപ്പെടുത്തിയില്ല. തെളിവുകള്‍ നിഷ്പക്ഷ ചരിത്രകാരന്‍മാര്‍ക്കും പഠനത്തിനായി ലഭ്യമാക്കണമെന്ന ആവശ്യം പുരാവസ്തുവകുപ്പ് പരിഗണിച്ചില്ല.
പള്ളിയ്ക്കടിയില്‍ കണ്ടെത്തിയ മറ്റൊന്ന് ഏതാനും മൃഗങ്ങളുടെ എല്ലുകളുടെ അവശിഷ്ടങ്ങളാണ്. ക്ഷേത്രത്തില്‍ ഇങ്ങനെ മൃഗങ്ങളുടെ അവശിഷ്ടങ്ങള്‍ വരാനിടയില്ല. ഉദ്ഖനനത്തില്‍ കണ്ടെത്തിയ ചുട്ട ഇഷ്ടികയുടെ ഘടന പുരാതന ക്ഷേത്രത്തിന്റെ പുരാവസ്തു അവശിഷ്ടമല്ലെന്ന് കുരുക്ഷേത്ര യൂനിവേഴ്‌സിറ്റിയിലെ ഡീനും പുരാവസ്തു വകുപ്പ് അംഗവുമായ പ്രൊഫ.സൂരജ് ബെന്‍ ചൂണ്ടിക്കാട്ടിയിരുന്നു.
ഇന്നും അയോധ്യയിലും പരിസരത്തും കാണുന്ന ഷെഡുകള്‍ക്ക് സമാനമാണിവ. ബാബരി മസ്ജിദിന് തെക്ക്, പുറം ചുവരിനു സമീപം കിടങ്ങു കുഴിച്ചപ്പോള്‍ കണ്ടെത്തിയ ചുട്ട ഇഷ്ടികയില്‍ നിര്‍മിച്ച കെട്ടിടത്തിന്റെ കാലവും 16ാം നൂറ്റാണ്ടില്‍ ബാബരി പള്ളി പണിത കാലവും തമ്മില്‍ ഏകദേശം രണ്ടുനൂറ്റാണ്ടിന്റെ വിടവുണ്ടായിരുന്നു. എന്നാല്‍, തുടര്‍ന്ന് നടത്തിയ പഠനത്തില്‍ ഇത് തെറ്റാണെന്ന് കണ്ടെത്തി.
ബാബരി മസ്ജിദ് പ്രദേശത്ത് നിരവധി സ്ഥലങ്ങളില്‍ ബനാറസ് ഹിന്ദു സര്‍വകലാശാല ഉദ്ഖനനം നടത്തിയപ്പോള്‍ ക്രി.ശേ. 13 മുതല്‍ 16 വരെയുള്ള മധ്യകാലഘട്ടവുമായി ബന്ധപ്പെട്ട ഇസ്‌ലാമിക ചില്ലുപാത്രങ്ങളുള്ള ആറു തട്ടുകള്‍ കണ്ടെത്താന്‍ കഴിഞ്ഞു. ബാബരി മസ്ജിദ് നിലവില്‍ വരുന്നതിനു മുമ്പുള്ള കാലഘട്ടത്തില്‍ ഈ പ്രദേശത്ത് മുസ്‌ലിം ജനവാസം ഉണ്ടായിരുന്നുവെന്നതിന്റെ തെളിവുകള്‍ ലഭിച്ചതായി ഡല്‍ഹി സര്‍വകലാശാലയിലെ ചരിത്രവിഭാഗം അധ്യാപകന്‍ ഡി.എന്‍ ഝാ ചൂണ്ടിക്കാട്ടിയിരുന്നു.
അതേസമയം, പള്ളിയുടെ ഒരു ഭാഗത്ത് ഖുര്‍ആനില്‍ നിന്നുള്ള ഏതാനും സൂക്തങ്ങളും അതിനു മുകളില്‍ പേര്‍ഷ്യന്‍ ഭാഷയിലുള്ള ചില വാക്യങ്ങളും ആലേഖനം ചെയ്യപ്പെട്ടിരുന്നു. പള്ളി തകര്‍ത്തതോടെ ഈ തെളിവുകള്‍ കൂടിയാണ് നഷ്ടപ്പെട്ടത്. 1883ല്‍ പള്ളിയ്ക്ക് പുറത്തുള്ള പ്ലാറ്റ്‌ഫോമില്‍ ക്ഷേത്രം പണിയാന്‍ അനുമതി നല്‍കണമെന്ന ആവശ്യം ഉന്നയിച്ചപ്പോള്‍ പള്ളിയുടെ അകത്താണ് രാമന്‍ ജനിച്ചതെന്ന വാദം ആരും ഉന്നയിച്ചിരുന്നില്ല.