ജിദ്ദ: സമസ്ത നടത്തുന്ന വിദ്യാഭ്യാസ,ജീവ കാരുണ്യ പ്രവര്‍ത്തനങ്ങളില്‍പ്രവാസികള്‍ നല്‍കുന്ന പിന്തുണയും സഹായവും വളരെ വലുതാണെന്ന് സമസ്ത കേരള ജംഇയ്യത്തുല്‍ ഉലമ ജനറല്‍ സെക്രട്ടറി പ്രൊഫ. ആലിക്കുട്ടി മുസ്‌ലിയാര്‍ പറഞ്ഞു. മത ഭൗതിക വിദ്യാഭ്യാസ മേഖലയില്‍ വിപ്ലവം സൃഷ്ടിച്ച സമസ്തയുടെ പ്രവര്‍ത്തനങ്ങള്‍ ലോകം മുഴുവന്‍ വ്യാപിച്ചു കൊണ്ടിരിക്കുകയാണെന്നും അദ്ദേഹം പറഞ്ഞു. ജിദ്ദ ഇസ്‌ലാമിക് സെന്ററില്‍ സമസ്ത നേതാക്കള്‍ക്ക് നല്‍കിയ സ്വീകരണ പരിപാടിയില്‍സംസാരിക്കുകയായിരുന്നു അദ്ദേഹം. പ്രതിസന്ധി ഉണ്ടാവുമ്പോള്‍ പ്രവാസികള്‍ പ്രപഞ്ച നാഥനോട് കൂടുതല്‍ പാപമോചനം തേടുകയും പ്രാര്‍ത്ഥന അധികരിപ്പിക്കുകയും വേണമെന്ന് അദ്ദേഹം ഓര്‍മ്മിപ്പിച്ചു. പീഡനങ്ങള്‍ അനുഭവിക്കുന്ന ലോക മുസ്‌ലിംകള്‍ക്കും പ്രതിസന്ധി നേരിടുന്ന പ്രവാസികള്‍ക്കും വേണ്ടി അദ്ദേഹം പ്രത്യേക പ്രാര്‍ത്ഥന നടത്തി

സമസ്ത കേന്ദ്ര മുശാവറ അംഗം എ.വി അബ്ദുറഹ്മാന്‍ മുസ്‌ലിയാര്‍ യോഗം ഉത്ഘാടനം ചെയ്തു. ജിദ്ദ ഇസ്‌ലാമിക് സെന്റര്‍ ഓഡിറ്റോറിയത്തില്‍ നടന്ന പരിപാടിയില്‍ സമസ്ത ഇസ്‌ലാമിക് സെന്റര്‍ സഊദി കമ്മിറ്റി പ്രസിഡന്റ് സയ്യിദ് ഉബൈദുല്ല തങ്ങള്‍ മേലാറ്റൂര്‍ അധ്യക്ഷത വഹിച്ചു. സമസ്ത വിദ്യാഭ്യാസ ബോര്‍ഡ് മാനേജര്‍ കെ. മൊയീന്‍ കുട്ടി മാസ്റ്റര്‍ സംസാരിച്ചു. ഒമാനൂര്‍ അബ്ദുറഹ്മാന്‍ മൗലവി, അബുബക്കര്‍ ദാരിമി താമരശ്ശേരി, അബുബക്കര്‍ ദാരിമി ആലമ്പാടി, മുസ്തഫ ഫൈസി ചേറൂര്‍, മുസ്തഫ ഹുദവി കൊടക്കാട് തുടങ്ങിയവര്‍ ആശംസ പ്രസംഗം നടത്തി. എം.സി. സുബൈര്‍ ഹുദവി പട്ടാമ്പി സ്വാഗതവും നൗഷാദ് അന്‍വരി മോളൂര്‍ നന്ദിയും പറഞ്ഞു.