ലണ്ടന്‍: ഇടവേളക്ക് ശേഷം ചാംപ്യന്‍സ് ലീഗ് മത്സരങ്ങള്‍ ഇന്ന് വീണ്ടും തുടങ്ങും. ഇന്നത്തെ മത്സരത്തോടെ രണ്ടാം റൗണ്ടിലേക്കുള്ള ചിത്രം തെളിയും.
ഇന്ന് രാത്രി 11.25ന് നടക്കുന്ന മത്സരത്തില്‍ എ.ഇ.കെ അയാക്‌സിനെ നേരിടും. ഇതേ സമയത്ത് നടക്കുന്ന മറ്റൊരു മത്സരത്തില്‍ സി.എസ്.കെ.എ മോസ്‌കോ പ്ലസനെ നേരിടും. ഗ്രൂപ്പ് ജിയില്‍ കരുത്തരായ റോമയും റയല്‍ മാഡ്രിഡും തമ്മിലാണ് കൊമ്പുകോര്‍ക്കുന്നത്. ഗ്രൂപ്പില്‍ റയല്‍ ഒന്നാം സ്ഥാനത്തും റോമ രണ്ടാം സ്ഥാനത്തുമാണുള്ളത്. മറ്റൊരു മത്സരത്തില്‍ ഗ്രൂപ്പ് എഫില്‍ ലിയോന്‍ ഇംഗ്ലീഷ് കരുത്തരായ മാഞ്ചസ്റ്റര്‍ സിറ്റിയുമായി കൊമ്പുകോര്‍ക്കും. ഗ്രൂപ്പ് എച്ചില്‍ യുവന്റസും വലന്‍സിയയും തമ്മിലാണ് മത്സരം. നിലവില്‍ 9 പോയിന്റുമായി യുവന്റസാണ് ഗ്രൂപ്പില്‍ ഒന്നാം സ്ഥാനത്ത് നില്‍ക്കുന്നത്. ഇതേ ഗ്രൂപ്പിലെ മറ്റൊരു മത്സരത്തില്‍ മാഞ്ചസ്റ്റര്‍ യുനൈറ്റഡ് യങ് ബോയ്‌സിനെ നേരിടും. ഗ്രൂപ്പ് ഇയില്‍ പത്ത് പോയിന്റുള്ള ബയേണ്‍ മ്യുണിക് ബെന്‍ഫിക്കയുമായി ഏറ്റുമുട്ടും.
ഗ്രൂപ്പ് എഫിലെ മറ്റൊരു മത്സരത്തില്‍ ഹോഫന്‍ഹെയിമും ഷാക്തറും തമ്മിലാണ് ഏറ്റുമുട്ടുന്നത്. സ്പാനിഷ് കരുത്തരായ അത്‌ലറ്റിക്കോ മാഡ്രിഡ് മൊണോക്കൊയെ നേരിടും. ഗ്രൂപ്പ് എയില്‍ അത്‌ലറ്റിക്കോ മാഡ്രിഡ് രണ്ടാം സ്ഥാനത്താണ്. ജര്‍മന്‍ ക്ലബായ ഡോര്‍ട്മുണ്ട് ഒന്നാം സ്ഥാനത്ത് തുടരുന്നു. ലോകോമോട്ടീവ് മോസ്‌കോയും ഗലാത്‌സറെയും തമ്മിലാണ് മറ്റൊരു മത്സരം.