ഭുവനേശ്വര്‍: 14 മത് ഹോക്കി ലോകകപ്പിന് നാളെ ഒഡിഷയിലെ ഭുവനേശ്വറില്‍ തുടക്കമാകും. മത്സരത്തില്‍ പങ്കെടുക്കുന്നതിനുള്ള എല്ലാ ടീമുകളും അഞ്ച് ദിവസം മുമ്പ് തന്നെ ഒഡിഷയിലെത്തിയിട്ടുണ്ട്.
പാകിസ്താന്‍, ആസ്‌ത്രേലിയ, നെതര്‍ലന്‍ഡ്‌സ്, ബെല്‍ജിയം ടീമുകളാണ് ആദ്യം ഇന്ത്യയിലെത്തിയത്. സാമ്പത്തിക ഞെരുക്കത്തെ തുടര്‍ന്ന് പാകിസ്താന്‍ ഇന്ത്യയിലെത്തുന്ന കാര്യത്തില്‍ സംശയമുണ്ടായിരുന്നു. എന്നാല്‍ പുതിയ സ്‌പോണ്‍സറെ കണ്ടെത്തിയതിനെ തുടര്‍ന്ന് പാകിസ്താനും ലോകകപ്പിനായി ഇന്ത്യയിലെത്തുകയായിരുന്നു. 16 രാജ്യങ്ങളാണ് ലോകകപ്പില്‍ പങ്കെടുക്കുന്നതിനായി ഭുവനേശ്വറിലെത്തിയിട്ടുള്ളത്. ഇതിന് മുമ്പ് 1982ലും 2010ലും ഹോക്കി ലോകകപ്പ് ഇന്ത്യയില്‍ നടന്നിരുന്നു. മന്‍പ്രീത് സിങ്ങാണ് ലോകകപ്പില്‍ പങ്കെടുക്കുന്ന ഇന്ത്യന്‍ സംഘത്തിനെ നയിക്കുന്നത്. ഗ്രൂപ്പ് സിയില്‍ ബെല്‍ജിയം, കാനഡ, ദക്ഷിണാഫ്രിക്ക എന്നിവരോടൊപ്പമാണ് ഇന്ത്യയുടെ സ്ഥാനം.
ബെല്‍ജിയവും കാനഡയും തമ്മിലാണ് ടൂര്‍ണമെന്റിലെ ആദ്യ മത്സരം. ദക്ഷിണാഫ്രിക്കയുമായി നാളെ ഏഴിനാണ് ഇന്ത്യയുടെ ആദ്യ മത്സരം. ലോകകപ്പിനായി മികച്ച ഒരുക്കങ്ങള്‍ നടത്തിയിട്ടുള്ള ഇന്ത്യ ഇത്തവണ വലിയ പ്രതീക്ഷയിലാണ്. ലോകകപ്പിനുമുന്നോടിയായുള്ള സന്നാഹ മത്സരത്തില്‍ ഒളിംപിക് ചാംപ്യന്‍മാരായ അര്‍ജന്റീനയെ എതിരില്ലാത്ത അഞ്ച് ഗോളിന് ഇന്ത്യ പരാജയപ്പെടുത്തിയിരുന്നു.