കാസര്‍കോട്: എല്ലാ ജില്ലകളിലും ആധുനിക നിലവാരത്തിലുള്ള ബഡ്‌സ് സ്‌കൂളുകള്‍ സ്ഥാപിക്കുന്നതിന്റെ ഭാഗമായി പ്രവര്‍ത്തനങ്ങള്‍ വിലയിരുത്തുന്നതിനു നിയമസഭയുടെ സ്ത്രീകളുടെയും കുട്ടികളുടെയും അംഗപരിമിതരുടെയും ക്ഷേമത്തിനായുളള സമിതി പുല്ലൂര്‍-പെരിയ പഞ്ചായത്തിലെ ചാലിങ്കാലിലുളള മഹാത്മ ബഡ്‌സ് സ്‌കൂള്‍ സന്ദര്‍ശിച്ചു. എല്ലാ ജില്ലകളിലും സര്‍ക്കാര്‍ ആരംഭിക്കുന്ന ബഡ്‌സ് സ്‌കൂളുകളുടെ ഭാഗമായി ആദ്യ ബഡ്‌സ് സ്‌കൂള്‍ കാസര്‍കോട് ജില്ലയില്‍ തുടങ്ങുമെന്നു സമിതി ചെയര്‍പേഴ്‌സണ്‍ ഐഷാ പോറ്റി പറഞ്ഞു.
ബഡ്‌സ് സ്‌കൂളിലെ ഓരോ ക്ലാസുകളിലേയും പ്രവര്‍ത്തനങ്ങളും കുട്ടികളുടെ പഠന രീതികളും സമിതി അംഗങ്ങള്‍ നേരിട്ടുകണ്ടു മനസിലാക്കി. ബഡ്‌സ് സ്‌കൂള്‍ ജീവനക്കാരുടെ ശമ്പള കുടിശ്ശിക സംബന്ധിച്ചും പരിമിതമായ വാഹന സൗകര്യം സംബന്ധിച്ചുമുളള പരാതികളില്‍ തദ്ദേശസ്വയംഭരണ വകുപ്പുമായി ചര്‍ച്ച ചെയ്തു തീരുമാനമെടുക്കും. ഇവിടെ വിവിധ പ്രായത്തിലുള്ള 78 വിഭിന്ന ശേഷിയുളള കുട്ടികള്‍ പഠിക്കുന്നുണ്ട്. എം.എല്‍.എമാരായ കെ.കെ രാമചന്ദ്രന്‍ നായര്‍, ഇ.കെ വിജയന്‍, എന്‍. ജയരാജന്‍, കെ. കുഞ്ഞിരാമന്‍, ജില്ലാ കലക്ടര്‍ കെ. ജീവന്‍ബാബു, ഡെപ്യൂട്ടി കലക്ടര്‍ സി. ബിജു എന്നിവരാണ് ബഡ്‌സ് സ്‌കൂള്‍ സന്ദര്‍ശിച്ചത്.