വാഷിങ്ടണ്‍: മുംബൈ ഭീകരാക്രമണത്തിന് പിന്നില്‍ പ്രവര്‍ത്തിച്ചവരെ പിടികൂടാന്‍ സഹായിക്കുന്ന വിവരം നല്‍കുന്നവര്‍ക്ക് 35 കോടി രൂപ (50 ലക്ഷം ഡോളര്‍) ഇനാം നല്‍കുമെന്ന് യു.എസ്. സ്റ്റേറ്റ് റിവാഡ്‌സ് ഫോര്‍ ജസ്റ്റിസ് (ആര്‍.എഫ്.ജെ) ആണ് തുക പ്രഖ്യാപിച്ചത്. വിവരങ്ങള്‍ കൈമാറുന്നത് രഹസ്യമായി സൂക്ഷിക്കുമെന്നും ഇവര്‍ അടുത്തുള്ള യു.എസ് എംബസിയെ സമീപിക്കണമെന്നും ആര്‍.എഫ്.ജെ അറിയിച്ചു. ഭീകരാക്രമണത്തിന്റെ പത്താം വാര്‍ഷികത്തിന്റെ പശ്ചാത്തലത്തിലാണ് യു.എസിന്റെ പ്രഖ്യാപനം. ലഷ്‌കറെ ത്വയ്ബയുടെ നേതൃത്വത്തിലുണ്ടായ ആക്രമണത്തില്‍ ആറ് യു.എസ് പൗരന്മാര്‍ ഉള്‍പ്പെടെ 166 പേര്‍ കൊല്ലപ്പെട്ടിരുന്നു.
പത്ത് വര്‍ഷം പിന്നിട്ടിട്ടും മുംബൈ ആക്രമണത്തിന് പിന്നില്‍ പ്രവര്‍ത്തിച്ചവരെ ശിക്ഷിക്കാന്‍ കഴിഞ്ഞിട്ടില്ല എന്നുള്ളത് ഇരകളുടെ കുടുംബങ്ങളോട് ചെയ്യുന്ന അനീതിയാണെന്ന് യു.എസ് സ്റ്റേറ്റ് സെക്രട്ടറി മൈക് പോംപിയോ പറഞ്ഞു. ലഷ്‌കറെ ത്വയ്ബ ഉള്‍പ്പെടെ ആക്രമണത്തിന് ഉത്തരവാദികളായ ഭീകരസംഘടനകള്‍ക്കെതിരേ യു.എന്‍ ചട്ടങ്ങള്‍ പ്രകാരം ഉപരോധം ഉള്‍പ്പെടെയുള്ള നടപടികള്‍ പാകിസ്താന്‍ സ്വീകരിക്കണം. കൊല്ലപ്പെട്ട ആറ് യു.എസ് പൗരന്‍മാരുടെ കുടുംബങ്ങളുടെ ദുഃഖത്തില്‍ പങ്കുചേരുന്നുവെന്നും പോംപിയോ പറഞ്ഞു.