കഴക്കൂട്ടം: അസഭ്യം പറഞ്ഞതിനെ ചോദ്യം ചെയ്ത ചെമ്പഴന്തി സ്വദേശികളെ വെട്ടിപരുക്കേല്‍പ്പിക്കുകയും തലയ്ക്കടിച്ച് കൊലപ്പെടുത്താനും ശ്രമിച്ച കേസില്‍ സഹോദരങ്ങള്‍ അറസ്റ്റിലായി. ചെമ്പഴന്തി ചാരേറ്റുകുളം സ്വദേശികളായ ദീപു(36), ഷിബു(38) എന്നിവരെയാണ് കഴക്കുട്ടം എസ്.എച്ച്.ഒ എസ്.വൈ. സുരേഷിന്റെ നേതൃത്വത്തിലുള്ള പൊലിസ് അറസ്റ്റ് ചെയ്തത്. ചാരേറ്റുകുളം റോഡ് പുതുക്കിപണിയുന്നതുമായി ബന്ധപ്പെട്ട് തര്‍ക്കമാണ് സംഭവത്തിന് പിന്നിലെന്ന് പൊലിസ് പറഞ്ഞു. ഇക്കഴിഞ്ഞ 19ന് രാത്രി എട്ടിനാണ് സംഭവം. പ്രതികള്‍ ചെമ്പഴന്തി സ്വദേശികളായ ഷിജുവിന്റെ കൈയ്ക്ക് വെട്ടുകയും സഹോദരന്‍ ഷിബുവിന്റെ തലയ്ക്കടിയും ചെയ്തുവെന്ന് പൊലിസ് പറഞ്ഞു.
ഒളിവില്‍പോയ പ്രതികളെ ആറ്റിങ്ങലില്‍ നിന്നും അറസ്റ്റുചെയ്യുകയായിരുന്നു. സൈബര്‍ സിറ്റി അസിസ്റ്റന്റ് കമ്മിഷണര്‍ അനില്‍കുമാറിന്റെ നിര്‍ദേശാനുസരണം കഴക്കൂട്ടം എസ്.എച്ച്.ഒ എസ്.വൈ സുരേഷിന്റെ നേതൃത്വത്തില്‍ എസ്.ഐ മാരായ റോയ്, അജയകുമാര്‍, എ.എസ്.ഐ ബാബു ,സി.പി.ഒ മാരായ ബിജു കുമാര്‍, എബ്രഹാം പെരേര, ശ്യാംലാല്‍ സന്തോഷ്, നിസാം ചേര്‍ന്നാണ് പ്രതികളെ അറസ്റ്റു ചെയ്തത്.