പയ്യന്നൂര്‍: രാമന്തളി ഏഴിമല നാവിക അക്കാദമിയുടെ അതിര്‍ത്തിക്കു പുറത്ത് മതിലരികില്‍ മൊട്ടക്കുന്ന് പ്രദേശത്തുനിന്ന് വന്‍ ആയുധശേഖരം കണ്ടെത്തി. നാവിക അക്കാദമി കേഡറ്റുമാര്‍ ശുചീകരണ പ്രവര്‍ത്തനം നടത്തുന്നതിനിടെയാണ് പ്ലാസ്റ്റിക് ചാക്കില്‍ പൊതിഞ്ഞ് കുറ്റിക്കാട്ടിനുള്ളില്‍ ഒളിപ്പിച്ച നിലയില്‍ ആയുധങ്ങള്‍ കണ്ടത്. വിവരമറിയിച്ചതിനെ തുടര്‍ന്ന് പയ്യന്നൂര്‍ എസ്.ഐ കെ.പി ഷൈനും സംഘവും സ്ഥലത്തെത്തി ആയുധങ്ങള്‍ കസ്റ്റഡിയിലെടുത്തു. പുതിയതും മൂര്‍ച്ചയേറിയതുമായ ഏഴ് വാളുകള്‍, ഇരുമ്പ് പിടിയോടു കൂടിയ രണ്ട് മഴു, ബോംബ് നിര്‍മാണത്തിനായി ഉപയോഗിക്കുന്ന പതിനാല് സ്റ്റീല്‍ കണ്ടെയ്‌നറുകള്‍ എന്നിവയാണ് പിടിച്ചെടുത്തത്. രാഷ്ട്രീയ സംഘര്‍ഷങ്ങള്‍ക്കു ശമനമില്ലാത്ത സാഹചര്യത്തില്‍ മേഖലയില്‍ പൊലിസ്, ബോംബ്, ഡോഗ് സ്‌ക്വാഡുകളുടെ സഹായത്തോടെ പരിശോധന നടത്തിവരികയായിരുന്നു. എസ്.ഐ കെ.പി ഷൈന്‍, സിവില്‍ പൊലിസ് ഓഫിസര്‍മാരായ ഷാജു തോമസ്, പി. വിശ്വനാഥന്‍ എന്നിവരടങ്ങുന്ന സംഘമാണ് ആയുധങ്ങള്‍ കസ്റ്റഡിയിലെടുത്തത്.