കോട്ടയം: പ്രളയം തകര്‍ത്ത കാര്‍ഷിക മേഖലയുടെ പുനരുജ്ജീവനത്തിന് വെജിറ്റബിള്‍ ആന്‍ഡ് ഫ്രൂട്ട് പ്രമോഷന്‍ കൗണ്‍സിലിന് 26 കോടി രൂപയുടെ പ്രത്യേക പാക്കേജ് അനുവദിക്കുമെന്ന് കൃഷി മന്ത്രി അഡ്വ. വി.എസ് സുനില്‍കുമാര്‍. വി.എഫ്.പി.സി.കെയുടെ 17-ാമത് വാര്‍ഷിക പൊതുയോഗം ഉദ്ഘാടനം ചെയ്യുകയായിരുന്നു അദ്ദേഹം.
ഇതിനുപുറമെ ശാസ്ത്രീയ കൃഷിരീതിക്കു വേണ്ടി ഏഴു കോടി രൂപയും അടിസ്ഥാന സൗകര്യങ്ങള്‍ പുനഃസ്ഥാപിക്കുന്നതിന് ഒരു ഹെക്ടറിന് ഒന്നര ലക്ഷം രൂപയും അധിക സഹായം അനുവദിക്കും. ശാസ്ത്രീയ രീതിയില്‍ ജൈവവളം ഉല്‍പാദിപ്പിച്ച് വിപണിയില്‍ എത്തിക്കാന്‍ വി.എഫ്.പി.സി.കെയ്ക്ക് അനുമതി നല്‍കിയിട്ടുണ്ട്. ഇതിനായി ഒരേക്കര്‍ സ്ഥലം വിട്ടുനല്‍കും.
നന്മ, മേന്മ എന്നീ പേരുകളിലുള്ള ജൈവ കീടനാശിനികള്‍ വ്യാവസായികാടിസ്ഥാനത്തില്‍ കൗണ്‍സില്‍ ഉല്‍പാദിപ്പിക്കും. യൂബര്‍ മാതൃകയില്‍ വിശാലമായ നെറ്റ്‌വര്‍ക്കിങ് സംവിധാനം വിപണിയില്‍ ആരംഭിക്കും.
ഈ സംവിധാനത്തിലൂടെ വിഷരഹിത ഉല്‍പന്നങ്ങള്‍ ഉപഭോക്താവിന് എവിടെ നിന്നും വാങ്ങാന്‍ കഴിയും. വി.എഫ്.പി.സി.കെയുടെ സംസ്ഥാനത്തുടനീളമുള്ള 284 സ്വാശ്രയ വിപണികളൂടെ വിപുലമായ സാധ്യതകള്‍ ഇതിനായി വിനിയോഗിക്കും. ഇത്തരത്തിലുള്ള വിപണി സാധ്യത കര്‍ഷകര്‍ മാതൃകയാക്കണമെന്നും അദ്ദേഹം പറഞ്ഞു.
മികച്ച കര്‍ഷകര്‍ക്കുള്ള വി.എഫ്.പി.സി.കെയുടെ സംസ്ഥാനതല 'ഹരിതകീര്‍ത്തി' അവാര്‍ഡുകളും അദ്ദേഹം വിതരണം ചെയ്തു. വി.എഫ്.പി.സി.കെ ആരംഭിക്കുന്ന നാടന്‍ വിത്തുകളുടെ വിതരണോദ്ഘാടനവും മന്ത്രി നിര്‍വഹിച്ചു. തെള്ളകം ചൈതന്യം പാസ്റ്റ
റല്‍ സെന്ററില്‍ നടന്ന ചടങ്ങില്‍ ജില്ലാ പഞ്ചായത്ത് പ്രസിഡന്റ് അഡ്വ. സണ്ണി പാമ്പാടി അധ്യക്ഷനായി. അഡ്വ. കെ. സുരേഷ് കുറുപ്പ് എം.എല്‍.എ മുഖ്യാതിഥിയായിരുന്നു. വി.എഫ്.പി.സി.കെ ചീഫ് എക്‌സിക്യൂട്ടീവ് ഓഫിസര്‍ സജി ജോണ്‍ റിപ്പോര്‍ട്ട് അവതരിപ്പിച്ചു.
ഏറ്റുമാനൂര്‍ ബ്ലോക്ക് പഞ്ചായത്ത് പ്രസിഡന്റ് ബീന ബിനു, അതിരമ്പുഴ ഗ്രാമപഞ്ചായത്ത് പ്രസിഡന്റ് മേരിക്കുട്ടി സെബാസ്റ്റ്യന്‍, ബ്ലോക്ക് പഞ്ചായത്തംഗം മോളി ലൂയിസ്, ഗ്രാമ പഞ്ചായത്തംഗം തോമസ് പുതുശ്ശേരില്‍, വി.എഫ്.പി.സി.കെ ഡയറക്ടര്‍മാരായ കെ.ആര്‍ മോഹനന്‍ പിള്ള, സിറിള്‍ കുര്യാക്കോസ്, കെ.എന്‍ രാമകൃഷ്ണന്‍, ട്രസ്റ്റ് ബോര്‍ഡ് അംഗങ്ങളായ കെ. ശംസുദ്ദീന്‍, പി.ജെ ശിവകുമാര്‍, എ. പ്രദീപന്‍, പ്രിന്‍സിപ്പല്‍ കൃഷി ഓഫിസര്‍ റെജിമോള്‍ മാത്യു സംസാരിച്ചു.