തൊടുപുഴ: വീടിന്റെ കാര്‍ പോര്‍ച്ചില്‍ നിര്‍ത്തിയിട്ടിരുന്ന സ്‌കൂട്ടര്‍ അജ്ഞാതര്‍ കത്തിച്ചു. ഞായറാഴ്ച രാത്രി 11ഓടെ തൊടുപുഴ അഞ്ചിരി നടുപ്പറമ്പില്‍ ഷാജിയുടെ സ്‌കൂട്ടറാണ് കത്തിനശിച്ചത്. രാത്രി 11.45ന് ഷാജിയുടെ മകന്‍ കിടന്നുറങ്ങുന്ന മുറിയിലേക്ക് പുക വ്യാപിച്ചതിനെ തുടര്‍ന്ന് കുട്ടി ബഹളം വച്ചു. അപ്പോഴാണ് സ്‌കൂട്ടറിന് തീവച്ച കാര്യം വീട്ടിലുള്ളവര്‍ അറിഞ്ഞത്.
പൊലിസ് വീട്ടിലും സമീപത്തെ വീട്ടിലും സ്ഥാപിച്ചിരുന്ന സി.സി.ടി.വി പരിശോധിച്ചതില്‍ നിന്ന് നീളമുള്ള കമ്പില്‍ കെട്ടിയ പന്തം ഉപയോഗിച്ച് സ്‌കൂട്ടര്‍ കത്തിക്കുന്ന ദൃശ്യം ലഭിച്ചു. ഡോഗ് സ്‌ക്വാഡിന്റെ നേതൃത്വത്തില്‍ പരിശോധന നടത്തി. വീടിന്റെ അടുത്ത് താമസിക്കുന്ന രണ്ടു പേരെ സംശയമുള്ളതായി ഷാജി പൊലിസിനോട് പറഞ്ഞു. പൊലിസ് അന്വേഷണം ആരംഭിച്ചു.