കൊടുവള്ളി: മുട്ടാഞ്ചേരി ഹസനിയ്യ എ.യു.പി സ്‌കൂളില്‍ പൊതുതെരഞ്ഞെടുപ്പിന്റെ എല്ലാഘട്ടങ്ങളും ഉള്‍ക്കൊള്ളിച്ച് നടത്തിയ സ്‌കൂള്‍ പാര്‍ലമെന്റ് തെരഞ്ഞെടുപ്പ് വിദ്യാര്‍ഥികള്‍ക്ക് നവ്യാനുഭവമായി. ത്രിതല പഞ്ചായത്ത് തെരഞ്ഞെടുപ്പ് മാതൃകയില്‍ ക്ലാസ് ലീഡര്‍, ബ്ലോക്ക് ലീഡര്‍, സ്‌കൂള്‍ ലീഡര്‍ എന്നീ മൂന്നു സ്ഥാനങ്ങളിലേക്കായിരുന്നു തെരഞ്ഞെടുപ്പ് നടന്നത്. വിദ്യാര്‍ഥികളില്‍ നിന്നു അഭിമുഖപരീക്ഷവഴി തിരഞ്ഞെടുത്ത വിദ്യാര്‍ഥികളായിരുന്നു വരണാധികാരിയും പ്രിസൈഡിങ് ഓഫിസറും പോളിങ് ഉദ്യോഗസ്ഥരും സുരക്ഷാ സേനയും ആയി പാര്‍ലമെന്റ് തെരഞ്ഞെടുപ്പിന് ചുക്കാന്‍ പിടിച്ചത്. 
ബന്ധപ്പെട്ട വാര്‍ത്തകളും ഫലപ്രഖ്യാപനവും വിദ്യാര്‍ഥികളിലേക്ക് തല്‍സമയം എത്തിക്കുന്നതില്‍ ജേര്‍ണലിസം ക്ലബ് വിദ്യാര്‍ഥികള്‍ മുന്നിട്ടിറങ്ങി. സ്‌കൂള്‍ ലീഡറായി സി.പി അംനാ ഹുദയും ഡെപ്യൂട്ടി ലീഡറായി പി.എം ടോം ഗമല്‍ മാര്‍ട്ടിനും തെരഞ്ഞെടുക്കപ്പെട്ടു. മടവൂര്‍ പഞ്ചായത്ത് പ്രസിഡന്റ് വി.സി അബ്ദുല്‍ ഹമീദ് മാസ്റ്റര്‍, വി.സി റിയാസ് ഖാന്‍ തുടങ്ങിയ ജനപ്രതിനിധികളും രക്ഷിതാക്കളും സംബന്ധിച്ചു.