പുതുച്ചേരി: ക്ഷേത്രഭൂമി വില്‍ക്കുന്നതിന് വിലക്കേര്‍പെടുത്തി പുതുച്ചേരി സര്‍ക്കാര്‍. എ.ഐ.എന്‍.ആര്‍.സി നേതാവ് എന്‍. രംഗസ്വാമിയുടെ നേതൃത്വത്തിലുള്ള മുന്‍ സര്‍ക്കാര്‍ നല്‍കിയ ഉത്തരവ് പിന്‍വലിച്ചാണ് എന്‍. നാരായണസ്വാമിയുടെ നേതൃത്വത്തിലുള്ള പുതിയ കോണ്‍ഗ്രസ് സര്‍ക്കാര്‍ ക്ഷേത്രഭൂമി വില്‍ക്കുന്നതിന് വിലക്ക് ഏര്‍പെടുത്തിയത്. എന്‍. രംഗസ്വാമി സര്‍ക്കാര്‍ ഏത് ആവശ്യത്തിനും ക്ഷേത്രഭൂമി വില്‍ക്കാനുള്ള അനുമതി നല്‍കിയിരുന്നു.

വില്‍പന തടഞ്ഞതിലൂടെ ക്ഷേത്ര പൈതൃകങ്ങളെ സംരക്ഷിക്കാനും പൂജകളും മറ്റും നടത്താനും എന്നും ക്ഷേത്രങ്ങള്‍ നിലനിര്‍ത്താനും തീരുമാനം സഹായിക്കുമെന്ന് പുതുച്ചേരി മുഖ്യമന്ത്രി എന്‍ നാരായണസ്വാമി പറഞ്ഞു. തന്റെ സര്‍ക്കാര്‍ ക്ഷേത്രം ടൂറിസം പ്രോത്സാഹിപ്പിക്കാനും തിരുനല്ലാര്‍ ഉള്‍പെടെയുള്ള ക്ഷേത്ര പൈതൃകങ്ങളെ സംരക്ഷിക്കാനും പ്രതിജ്ഞാബദ്ധമാണെന്ന് അദ്ദേഹം പറഞ്ഞു.

സനീസ് വാറര്‍ ക്ഷേത്രം ടൂറിസത്തിന്റ ഭാഗമാക്കിയതോടെ രാജ്യത്തിന്റെ വിവധ ഭാഗങ്ങളില്‍ നിന്നുള്ള ജനങ്ങള്‍ അവിടേക്ക് ഒഴുകുകയാണ്. ഇതാണ് പുതിയ തീരുമാനത്തിന്റെ പിന്നിലെന്നാണ് റിപ്പോര്‍ട്ടുകള്‍.