കോതമംഗലം: കോഴിഫാമില്‍ ഇര തേടിയെത്തിയ മലമ്പാമ്പ് കോഴികളുടെ സംരക്ഷണക്കായി വിരിച്ചിരുന്ന വലയില്‍ കുടുങ്ങി. കോട്ടപ്പടി നാഗഞ്ചേരി മറ്റനേഴില്‍ ശശീന്ദ്രന്റെ കോഴിഫാമിലാണ് മലമ്പാമ്പ് അകപ്പെട്ടത്.
രാത്രിയിലാണ് മലമ്പാമ്പ് എത്തിയതെന്നാണ് സംശയിക്കുന്നത്. ഇന്നലെ ഉച്ചയോടെ വലയില്‍ കുടുങ്ങിയ നിലയില്‍ എന്തോ പിടക്കുന്നത് ശ്രദ്ധയില്‍ പെട്ട വീട്ടുകാര്‍ ചെന്നു നോക്കിയപ്പോഴാണ് രക്ഷപെടാനാകാത്ത വിധം മലമ്പാമ്പ് വലയില്‍ കുടുങ്ങിക്കിടക്കുന്നത് ശ്രദ്ധയില്‍പ്പെട്ടത്. വീട്ടുകാര്‍ അറിയിച്ചതു പ്രകാരം സ്ഥലത്ത് എത്തിയ റെയ്ഞ്ച് ഓഫീസര്‍ ബാബുരാജിന്റെ നിര്‍ദ്ദേശാനുസരണം   വനം വകുപ്പ് വാച്ചര്‍ ഷൈന്‍ പാമ്പിനെ പിടികൂടി.
മൂന്ന് വയസ് പ്രായമുള്ള പെണ്‍ പാമ്പാണ് കുടുങ്ങിയത്. തട്ടേക്കാട് പക്ഷിസങ്കേതത്തില്‍ എത്തിച്ച പാമ്പിനെ ഏതാനും ദിവസം നിരീക്ഷിച്ച ശേഷം വനത്തിലേക്ക് തുറന്ന് വിടുമെന്ന് അധികൃതര്‍ അറിയിച്ചു.