തിരുവനന്തപുരം: കഴിഞ്ഞ മൂന്നര വര്‍ഷത്തിനിടെ ജീവനൊടുക്കിയത് 50 പൊലിസ് ഉദ്യോഗസ്ഥര്‍. ഏറ്റവും കൂടുതല്‍ പേര്‍ ആത്മഹത്യ ചെയ്തത് തിരുവനന്തപുരം റൂറല്‍ പൊലിസ് ജില്ലയിലാണ്. ഡിവൈ.എസ്.പി ഉള്‍പ്പെടെ എട്ടു പൊലിസ് ഉദ്യോഗസ്ഥരാണ് സ്വയം മരണം വരിച്ചത്.
കൊല്ലം ജില്ലയില്‍ ഏഴും ആലപ്പുഴ ജില്ലയില്‍ അഞ്ചും തിരുവനന്തപുരം സിറ്റി, എറണാകുളം സിറ്റി, കോഴിക്കോട് സിറ്റി, കോട്ടയം എന്നിവിടങ്ങളില്‍ നാലു വീതം പൊലിസ് ഉദ്യോസ്ഥരും ആത്മഹത്യ ചെയ്തു. ഇടുക്കിയില്‍ മൂന്നു പേരും, എറണാകുളം റൂറല്‍, തൃശൂര്‍, കണ്ണൂര്‍, മലപ്പുറം എന്നിവിടങ്ങളില്‍ രണ്ടു പേര്‍ വീതവും, പാലക്കാട്, കോഴിക്കോട് റൂറല്‍, വയനാട്, കാസര്‍കോട്, റെയിവേ എന്നിവിടങ്ങളില്‍ ഓരോ ആളുമാണ് ആത്മഹത്യ ചെയ്തത്.
എസ്.ഐ, എ.എസ്.ഐ റാങ്കിലുള്ള പതിനാറും സിവില്‍ പൊലിസ് ഓഫിസര്‍ തസ്തികയിലുള്ള ഇരുപതിയഞ്ച് പേരും നാലു വനിത സിവില്‍ പൊലിസ് ഓഫിസര്‍മാരും ആത്മഹത്യ ചെയ്തിട്ടുള്ളതായി നിയമസഭയില്‍ മുഖ്യമന്ത്രി പിണറായി വിജയന്‍ മഞ്ഞളാംകുഴി അലിയെ അറിയിച്ചു.