കാസര്‍കോട്: സമസ്ത സീനിയര്‍ ഉപാധ്യക്ഷനും ഒട്ടനവധി മഹല്ലുകളുടെ ഖാസിയും ഗോളശാസ്ത്ര വിദഗ്ധനുമായിരുന്ന സി.എം അബ്ദുല്ല മൗലവിയുടെ കൊലപാതകവുമായി ബന്ധപ്പെട്ട സത്യം എന്നായാലും പുറത്തുവരുമെന്ന് സമസ്ത കേരള ജംഇയ്യത്തുല്‍ മുഅല്ലിമീന്‍ സംസ്ഥാന ജനറല്‍ സെക്രട്ടറിയും സമസ്ത കേന്ദ്ര മുശാവറ അംഗവുമായ ഡോ. ബഹാഉദ്ദീന്‍ മുഹമ്മദ് നദ്‌വി.
അബ്ദുല്ല മൗലവിയുടെ കുടുംബവും ജനകീയ ആക്ഷന്‍ കമ്മിറ്റിയും സംയുക്തമായി കാസര്‍കോട്ട് നടത്തുന്ന അനിശ്ചിതകാല സമരത്തില്‍ ഇന്നലെ നടന്ന പരിപാടി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
സത്യാവസ്ഥ കാലങ്ങളോളം മൂടിവയ്ക്കപ്പെട്ട ഒട്ടേറെ സംഭവങ്ങള്‍ ഇന്ത്യയിലും വിദേശ രാജ്യങ്ങളിലും ഉണ്ടായിട്ടുണ്ട്. എന്നാല്‍ വര്‍ഷങ്ങള്‍ക്കു ശേഷം പകല്‍ വെളിച്ചം പോലെ സത്യം പുറത്തുവരുകയും ചെയ്തിട്ടുണ്ട്. സി.എം അബ്ദുല്ല മൗലവിയുടെ കാര്യത്തിലും ഇതു തന്നെ സംഭവിക്കുമെന്നും ജനകീയ പോരാട്ടങ്ങള്‍ക്ക് ശക്തി പകരാന്‍ എല്ലാ വിഭാഗം ആളുകളും സമരത്തില്‍ പങ്കെടുക്കണമെന്നും അദ്ദേഹം പറഞ്ഞു. അബ്ദുല്ല മൗലവി ജാതിമത ഭേദമന്യേ ജനങ്ങളുടെ ആദരവ് നേടിയ വ്യക്തിത്വമായിരുന്നുവെന്നും അദ്ദേഹത്തിന്റെ കൊലപാതകികളെ നിയമത്തിന് മുന്നിലെത്തിക്കാന്‍ ജനകീയ പ്രക്ഷോഭങ്ങള്‍ ശക്തമാക്കണമെന്നും ബഹാഉദ്ദീന്‍ നദ്‌വി കൂട്ടിച്ചേര്‍ത്തു.
അബൂബക്കര്‍ ഉദുമ അധ്യക്ഷനായി. സയ്യിദ് ഹുസൈന്‍ തങ്ങള്‍, സിദ്ദീഖ് നദ്‌വി ചേറൂര്‍, ലുഖ്മാന്‍ തളങ്കര, റഊഫ് യമാനി ലക്ഷദ്വീപ്, സി.എ ശാഫി ചെമ്പരിക്ക, ഉനൈസ് ഹുദവി, ഹാരിസ്, മുനീര്‍ കുന്ദാപുര സംസാരിച്ചു.