മുക്കം: ദിവസങ്ങള്‍ നീണ്ട അനിശ്ചിതത്വങ്ങള്‍ക്കൊടുവില്‍ മുക്കം സര്‍വിസ് സഹകരണ ബാങ്കിലേക്ക് നടന്ന തെരഞ്ഞെടുപ്പില്‍ വിജയിച്ച യു.ഡി.എഫ് ഭരണസമിതിയിലെ പ്രസിഡന്റ്, വൈസ് പ്രസിഡന്റ് തെരഞ്ഞെടുപ്പ് ഇന്ന് നടക്കും.
ഇതു സംബന്ധിച്ച അറിയിപ്പ് വരണാധികാരിയില്‍നിന്ന് ലഭിച്ചതായി ഡയരക്ടര്‍മാര്‍ അറിയിച്ചു. രണ്ടാഴ്ചയോളമായിട്ടും പ്രസിഡന്റ്, വൈസ് പ്രസിഡന്റ് തെരഞ്ഞെടുപ്പ് നടത്താന്‍ വരണാധികാരി എത്താത്തതിനെ തുടര്‍ന്ന് യു.ഡി.എഫ് നേതാക്കളായ ഒ.കെ ബൈജു, എ.എം അബ്ദുല്ല എന്നിവര്‍ ഹൈക്കോടതിയെ സമീപിച്ചിരുന്നു. തുടര്‍ന്ന് എന്ന് തെരഞ്ഞെടുപ്പ് നടത്താനാവുമെന്ന് വെള്ളിയാഴ്ച വ്യക്തമാക്കണമെന്ന് കോടതി വരണാധികാരിയോട് ആവശ്യപ്പെട്ടിരുന്നു.
ഇതിന്റെ അടിസ്ഥാനത്തിലാണ് ഇന്ന് തെരഞ്ഞെടുപ്പ് നടത്താമെന്നും അതില്‍ പങ്കെടുക്കണമെന്നും ആവശ്യപ്പെട്ട് വരണാധികാരി ഡയരക്ടര്‍മാര്‍ക്ക് കത്തയച്ചത്. കഴിഞ്ഞ 11നായിരുന്നു മുക്കം സഹകരണ ബാങ്ക് തെരഞ്ഞെടുപ്പ് നടന്നത്. തെരഞ്ഞെടുപ്പും ഫലപ്രഖ്യാപനവും കഴിഞ്ഞിട്ട് രണ്ടാഴ്ച പിന്നിട്ടിട്ടും പുതിയ ഭരണസമിതിയംഗങ്ങള്‍ക്ക് ഇതുവരെ അധികാരമേല്‍ക്കാന്‍ സാധിച്ചിരുന്നില്ല.