ആലപ്പുഴ : നഗരത്തില്‍ സ്റ്റേഡിയം വാര്‍ഡിലുണ്ടായ തീ പിടുത്തത്തില്‍ ഒരു വീട് പൂര്‍ണമായും കത്തിനശിച്ചു. ഇന്നലെ ഉച്ചക്ക് രണ്ട് മണിയോടെയാണ് സംഭവം. വീട്ടുപകരണങ്ങളോടൊപ്പം വസ്ത്രങ്ങളും പണവും സര്‍ട്ടിഫിക്കറ്റുകളും കത്തിയമര്‍ന്നു. സ്റ്റേഡിയം വാര്‍ഡില്‍ മുരളിയുടെ ഉടമസ്ഥതയിലുള്ള ശ്രീശൈലം വീടിനാണ് തീപിടിത്തമുണ്ടായത്.
ഈ വീട്ടില്‍ കഴിഞ്ഞ ആറ് മാസമായി താമസിക്കുന്നത് ഷാജിയും കുടുംബവുമാണ്. ചുമട്ടുതൊഴിലാളിയായ ഷാജി രാവിലെ ജോലിക്കുപോയതിന് പിന്നാലെ ഭാര്യയും മകനും ഉച്ചയോടെ വീട്ട് പൂട്ടി പോയി. ഇതിന് ശേഷമാണ് തീപിടിത്തമുണ്ടായത്. പുക ഉയരുന്നത് കണ്ട സമീപവാസി ഷാജിയേയും ഫയര്‍ഫോഴ്‌സിനെയും വിവരം അറിയിക്കുകയായിരുന്നു.
ഫയര്‍ഫോഴ്‌സ് എത്തിയപ്പോഴേക്കും വീട്ടുപകരണങ്ങള്‍ പൂര്‍ണമായും കത്തിനശിച്ചു. കട്ടിലുകള്‍, അലമാരകള്‍, ഫാനുകള്‍, മിക്‌സി, ഡൈനിങ് ടേബിള്‍, സോഫ സെറ്റി എന്നീ ഉപകരണങ്ങള്‍ കൂടാതെ അലമാരയില്‍ തൂക്കിയിട്ടിരുന്ന വസ്ത്രങ്ങളും പൂര്‍ണമായും കത്തിനശിച്ചു. തീപിടിത്തത്തിന്റെ കാരണം വ്യക്തമായിട്ടില്ല.