മുംബൈ: തകര്‍ച്ചയില്‍ നിന്നും തകര്‍ച്ചയിലേക്ക് കൂപ്പുകുത്തുന്ന റിലയന്‍സ് കമ്മ്യൂണിക്കേഷന്‍സിന്റെ ഡയരക്ടര്‍ സ്ഥാനത്ത് നിന്നും രാജിവച്ച് അനില്‍ അംബാന. ഡയരക്ടര്‍മാരായിരുന്ന ഛായ വിരാനി, റൈന കരാനി, മഞ്ജരി കാക്കര്‍, സുരേഷ് രംഗാചര്‍ തുടങ്ങിയവരും സ്ഥാനത്ത് നിന്നും രാജിവച്ചിട്ടുണ്ട്.

2019-20 സാമ്പത്തിക വര്‍ഷത്തിലെ രണ്ടാം പാദത്തിലേക്ക് കടക്കുമ്പോള്‍ കമ്പനിയുടെ ഇതുവരേയുള്ള സാമ്പത്തിക നഷ്ടം 30142 കോടി രൂപയാണെന്നുള്ള കണക്കുകള്‍ ഇന്നലെ പുറത്തു വന്നിരുന്നു. ഇതിന് പിന്നാലെയാണ് അനില്‍ അംബാനി ഉള്‍പ്പെടെയുള്ളവരുടെ രാജി. മുംബൈ സ്റ്റോക്ക് എക്‌സ്‌ചേഞ്ചിനും നാഷണല്‍ സ്‌റ്റോക്ക് എക്‌സ്‌ചേഞ്ചിനുമയച്ച കത്തിലാണ് അഞ്ച് പേരുടെയും രാജിക്കാര്യം സംബന്ധിച്ചുള്ള വിവരങ്ങളുള്ളത്. കഴിഞ്ഞ മേയില്‍ കമ്പനി പാപ്പരായതായി ഔദ്യോഗികമായി പ്രഖ്യാപനം വന്നിരുന്നു.

ദേശീയ കമ്പനി നിയമ കോടതിയില്‍ റിലയന്‍സ് കമ്മ്യൂണിക്കേഷന്‍സിനെതിരായ നിയമനടപടി സ്വീകരിക്കുന്നത് 357 ദിവസത്തേക്ക് നീട്ടിവെക്കണമെന്നാവശ്യപ്പെട്ട് ഹരജി നല്‍കിയതിന് പിന്നാലെയാണ് പാപ്പരായതായുള്ള ഔദ്യോഗിക പ്രഖ്യാപനം പുറത്തുവന്നത്. ഏകദേശം 50000 കോടി രൂപയോളമാണ് വിവിധ ബാങ്കുകളിലായി റിലയന്‍സ് കമ്മ്യൂണിക്കേഷന്‍സിന് ബാധ്യതയുള്ളത്.

സ്വത്ത് വകകളെല്ലാം വില്‍ക്കേണ്ട അവസ്ഥയിലാണ് ഇപ്പോള്‍ കമ്പനിയുള്ളത്. എന്നാല്‍പോലും നിലവിലെ ബാധ്യതകള്‍ തീരാത്ത അവസ്ഥയാണുള്ളത്. അതേസമയം ജ്യേഷ്ഠനും റിലയന്‍സ് ഇന്‍ഡസ്ട്രീസ് ഉടമയുമായ മുകേഷ് അംബാനിയുടെ കീഴിലുള്ള റിലയന്‍സ് ജിയോ, റിലയന്‍സ് കമ്മ്യൂണിക്കേഷന്‍സിന്റെ ആസ്ഥികള്‍ ലേലത്തില്‍ വാങ്ങാന്‍ പോകുന്നു എന്ന തരത്തിലുള്ള വാര്‍ത്തകള്‍ പുറത്തുവന്നിരുന്നു. 5ഏ സൗകര്യം ലഭ്യമാകുന്നതിന് മുന്‍പ് പരമാവധി ടവറുകളും മറ്റ് സൗകര്യങ്ങളും സ്വന്തമാക്കുക എന്ന ലക്ഷ്യത്തോടെയാണ് ഇതെന്നും വാര്‍ത്ത വന്നിരുന്നു.