കോഴിക്കോട്: ആള്‍പ്പാര്‍പ്പില്ലാത്ത റെയില്‍വേ ക്വോര്‍ട്ടേഴ്‌സില്‍ യുവാവിനെ മരിച്ച നിലയില്‍ കണ്ടെത്തിയ കേസില്‍ കൂട്ടു പ്രതിയെന്ന് കരുതുന്നയാള്‍ക്കായി അന്വേഷണം ഊര്‍ജിതമാക്കി പൊലിസ്. കാസര്‍കോട് സ്വദേശിയെന്ന് സംശയിക്കുന്ന നാസറിനുവേണ്ടിയാണ് പൊലിസ് അന്വേഷണം നടത്തുന്നത്. അതേ സമയം അറസ്റ്റിലായ പ്രതി നല്ലളം ബസാറില്‍ വടക്കേത്തടത്തില്‍ നൗഫലിനെ കോടതി റിമാന്‍ഡ് ചെയ്തു. പയ്യാനക്കല്‍ ചക്കും കടവ് സ്വദേശി സുധീര്‍ബാബുവാണ് മൂന്നാഴ്ച മുന്‍പ് കൊല്ലപ്പെട്ടത്. മദ്യ ലഹരിയിലുണ്ടായ സംഘര്‍ഷത്തെത്തുടര്‍ന്ന് കല്ലുകൊണ്ട് തലക്കടിയേറ്റാണ് ഇയാള്‍ കൊല്ലപ്പെട്ടത്. റെയില്‍വേ ക്വാര്‍ട്ടേഴ്‌സുകള്‍ സാമൂഹ്യവിരുദ്ധ താവളമാകുന്നതിനെക്കുറിച്ച് നേരത്തെയും പരാതി ഉയര്‍ന്നിരുന്നു. മുന്‍പും ഇവിടെ ദുരൂഹമായ കൊലപാതകം നടന്നിരുന്നു.