ചെങ്ങന്നൂര്‍: ഓഗസ്റ്റിലുണ്ടായ മഹാപ്രളയത്തില്‍ പമ്പയാറ്റില്‍ അടിഞ്ഞു കൂടിയ മാലിന്യങ്ങള്‍ ഒന്നാം വാര്‍ഡ് സാനിറ്റേഷന്‍ കമ്മിറ്റിയുടെ നേതൃത്വത്തില്‍ പൂര്‍ണമായി നീക്കം ചെയ്തു. പ്രളയം കൂടുതല്‍ നാശം വിതച്ച പ്രദേശങ്ങളിലൊന്നായ പാണ്ടനാട്ടിലെ കുത്തിയതോട് പാലത്തിനടിയില്‍ കുന്നുകൂടിയ മാലിന്യങ്ങളാണ് നീക്കം ചെയ്തത്. പ്രളയത്തെ തുടര്‍ന്ന് പാലത്തിന്റെ വശങ്ങളില്‍ മാലിന്യമടിഞ്ഞ് ദുര്‍ഗന്ധ വമിക്കുന്ന നിലയിലായിരുന്നു. ഇതോടെ പ്രദേശത്തെ എഴുപതോളം കുടുംബങ്ങളുടെ ജീവിതം ദുരിതപൂര്‍ണമായിരുന്നു.
നീരൊഴുക്ക് തടസപ്പെട്ട പമ്പയാറ് കൂട്ടായ പരിശ്രമത്തിലൂടെയാണ് ശുചിയാക്കിയത്. പാലത്തിനോട് ചേര്‍ന്ന് വിശാലമായ പടവുകളോടുകൂടിയ കുളിക്കടവും മാലിന്യം നിറഞ്ഞുപയോഗിക്കാനാകാത്ത സ്ഥിതിയിലായിരുന്നതും മാലിന്യമുക്തമാക്കി. നവീകരണപ്രവൃത്തികള്‍ക്ക് ഗ്രാമ പഞ്ചായത്ത് അംഗം ഷെര്‍ളി മാത്യു, ജെ.എച്ച്.ഐ ബിജു, ജെ.പി.എച്ച്.എന്മാരായ നൈജ, എന്‍.ലത, കുഞ്ഞുമോള്‍, സാനിറ്റേഷന്‍ കമ്മിറ്റി അംഗങ്ങള്‍, നാട്ടുകാര്‍ എന്നിവര്‍ നേതൃത്വം നല്‍കി. രണ്ടുദിവസം കൊണ്ടാണ് പമ്പാനദിയും പരിസരവും ശുചിയാക്കിയത്.