ന്യൂഡല്‍ഹി: പി.യു ചിത്രയെ ലോക അത്‌ലറ്റിക് മീറ്റില്‍ പങ്കെടുപ്പിക്കണമെന്ന കേരള ഹൈക്കോടതി വിധി മാനിക്കണമെന്ന് അത്‌ലറ്റിക് ഫെഡറേഷനോട് കേന്ദ്ര കായിക മന്ത്രി വിജയ് ഗോയല്‍. ചിത്രക്ക് വൈല്‍ഡ് കാര്‍ഡ് എന്‍ട്രി നല്‍കണമെന്നും വിധിക്കെതിരേ അപ്പീല്‍ പോകരുതെന്നും മന്ത്രി ആവശ്യപ്പെട്ടു.

അത്‌ലറ്റിക് ഫെഡറേഷന്‍ പ്രസിഡന്റ് സുമാരിവാലയോടാണ് കേന്ദ്ര കായിക മന്ത്രി നിര്‍ദേശം നല്‍കിയത്. ചിത്രയെ ലോക അത്‌ലറ്റിക് ചാംപ്യന്‍ഷിപ്പില്‍ പങ്കെടുപ്പിക്കണമെന്നാവശ്യപ്പെട്ട് ലോക കായിക ഫെഡറേഷന് കത്തയക്കുമെന്ന് സുമാരിവാലിയ അറിയിച്ചു.

ചിത്രക്ക് ലോക അത്‌ലറ്റിക് മീറ്റില്‍ പങ്കെടുക്കാനാകില്ലെന്ന് അത്‌ലറ്റിക് ഫെഡറേഷന്‍ ഇന്ന് അറിയിച്ചിരുന്നു. സമയ പരിധി കഴിഞ്ഞെന്നായിരുന്നു ഫെഡറേഷന്‍ നല്‍കിയ വിശദീകരണം.

ചിത്രയെ ലോക അത്‌ലറ്റിക് ചാമ്പ്യന്‍ഷിപ്പില്‍ പങ്കെടുപ്പിക്കുന്നതിന് കേന്ദ്ര കായിക മന്ത്രി വിജയ് ഗോയല്‍ ഇടപെടണമെന്ന് മുഖ്യമന്ത്രി പിണറായി വിജയന്‍ ആവശ്യപ്പെട്ടിരുന്നു വൈല്‍ഡ് കാര്‍ഡ് എന്‍ട്രി ഉപയോഗിച്ച ചിത്രക്ക് അവസരമൊരുക്കണമെന്നും ഇന്നു തന്നെ ഇക്കാര്യത്തില്‍ തീരുമാനമുണ്ടാകണമെന്നും മുഖ്യമന്ത്രി ആവശ്യപ്പെട്ടു.