മട്ടാഞ്ചേരി: ആലിന്‍ ചുവട് പറമ്പില്‍ നില്‍ക്കുന്ന കൂറ്റന്‍ ആല്‍മരത്തിന്റെ ശിഖിരം വീടുകള്‍ക്ക് മുകളിലേക്ക് വീണ് ഷീറ്റ് മേഞ്ഞ വീടുകളുടെ മേല്‍ക്കൂരകള്‍ ഭാഗികമായി തകര്‍ന്നു.
വെള്ളിയാഴ്ച രാത്രി എട്ട് മണിയോടെയാണ് ആല്‍മരത്തിന്റെ ശിഖിരം വീണത്. ഇവിടെ പതിനൊന്ന് വീടുകളാണുള്ളത്. ഈ വീടുകള്‍ക്ക് ആല്‍മരം ഭീഷണിയാണ്. ഇതിന് പുറമേ വീടുകള്‍ക്ക് പിറകില്‍ ഒരു മില്ലും സ്ഥിതി ചെയ്യുന്നുണ്ട്. ആല്‍മരത്തിന്റെ വേരുകള്‍ ആഴ്ന്നിറങ്ങി പല വീടുകളുടേയും മതിലുകള്‍ക്ക് വിള്ളല്‍ വീണിട്ടുണ്ട്. ആല്‍മരം മുറിച്ച് നീക്കണമെന്ന് നഗരസഭ അധികൃതരോട് പലകുറി ആവശ്യപ്പെട്ടിട്ടും നടപടിയുണ്ടായിട്ടില്ല.
മറിഞ്ഞ് വീണ് ആല്‍മരത്തിന്റെ ശിഖിരം ഇന്നലെ നഗരസഭ ജീവനക്കാരെത്തി നീക്കം ചെയ്തു. അതേസമയം വീടുകളുടെ തകര്‍ന്ന ഷീറ്റുകള്‍ നീക്കിയിട്ടില്ല. എന്നാല്‍ ഇവിടെ താമസിക്കുന്ന പതിനൊന്ന് വീട്ടുകാരെ അസ്‌റാജ് ബില്‍ഡിങില്‍ വരുന്ന ഫ്‌ളാറ്റിലേക്ക് മാറ്റി താമസിപ്പിക്കുവാനുള്ള നടപടികള്‍ സ്വീകരിക്കുമെന്നാണ് അറിയുന്നത്.