വണ്ടൂര്‍:ഓടികൊണ്ടിരിക്കുന്ന വാഹനങ്ങള്‍ക്ക് മുകളില്‍ റോഡരുകിലെ വന്‍മരം കടപുഴകി വീണ് അപകടം. അഞ്ചു പേര്‍ക്ക് പരുക്ക്. വണ്ടൂര്‍ കാളികാവ് റോഡില്‍ നിംസ് ആശുപത്രിക്ക് മുന്‍വശത്താണ് ഇന്നലെ വൈകീട്ട് 5 മണിയോടെ ഓടികൊണ്ടിരിക്കുന്ന കാറിനും ,വാനിനും മുകളില്‍ മരം വീണത്. പോരൂര്‍ കരുവാറ്റക്കുന്ന് സ്വദേശി മംഗലം അബ്ദുട്ടിമാസ്റ്ററുടെ കുടുംബം സഞ്ചരിച്ച കാറിനു മുകളിലാണ് മരം വീണത്.
കാറിലുണ്ടായിരുന്ന മംഗലം അബ്ദുള്ള(67),റുഖിയ(64),ഷാഹിന(33),അസ്‌ക(12) സമീപത്തെ വര്‍ക്ക് ഷോപ്പ് ജീവനക്കാരനായ ആലിക്കാപറമ്പില്‍ ഷിബു(37) എന്നിവര്‍ക്കാണ് പരുക്കേറ്റത്.ആരുടെയും പരുക്ക് ഗുരുതരമല്ല. അപകടത്തില്‍ കാര്‍ നിയന്ത്രണംതെറ്റി മറിയുകയും ചെയ്തു
മരംവീണതോടെ കാര്‍ ഒരു ഭാഗത്തേക്ക് മറിഞ്ഞതും മരത്തിന്റെ കൊമ്പുകള്‍ കാറിന് ഇരുവശത്തും കുത്തിനിന്നതും കാരണം വന്‍ ദുരന്തമാണ് വഴിമാറിയത്. വാനിലുണ്ടായിരുന്നവര്‍ക്ക്് പരുക്കൊന്നുമില്ല. മരത്തിന്റെ അടിഭാഗം ദ്രവിച്ചിരുന്നു. ഇരു വാഹനങ്ങള്‍ക്കും കേട് സംഭവിച്ചിട്ടുണ്ട് . തിരുവാലിയില്‍ നിന്നുള്ള ഫയര്‍ഫോഴ്‌സ്, വണ്ടൂര്‍ പൊലിസ്,ട്രോമ കെയര്‍, നാട്ടുകാര്‍ എന്നിവര്‍ ചേര്‍ന്നാണ് മരം മുറിച്ചുമാറ്റി ഗതാഗതം പുന:സ്ഥാപിച്ചത്.