കൊച്ചി: കനത്ത മഴയിലും കാറ്റിലും വിളനാശം നേരിട്ട ജില്ലയിലെ കര്‍ഷകര്‍ക്ക് നഷ്ടപരിഹാരം ലഭ്യമാക്കുന്നതിലെ കാലതാമസം ഒഴിവാക്കണമെന്ന് ജില്ലാ വികസന സമിതി. കര്‍ഷകരില്‍ ഭൂരിഭാഗത്തിനും വിള ഇന്‍ഷുന്‍സ് ഇല്ലെന്നത് നഷ്ടപരിഹാരം അനുവദിക്കുമ്പോള്‍ കണക്കിലെടുക്കണം. മണല്‍ക്ഷാമം രൂക്ഷമായ സാഹചര്യത്തില്‍ മണല്‍ വാരല്‍ പുനരാരംഭിക്കാന്‍ നടപടി സ്വീകരിക്കണമെന്നും ജില്ലാ കലക്ടര്‍ മുഹമ്മദ് വൈ സഫിറുല്ലയുടെ അധ്യക്ഷതയില്‍ ചേര്‍ന്ന യോഗത്തില്‍ അഭിപ്രായമുയര്‍ന്നു.
എല്‍ദോ എബ്രഹാം എം.എല്‍.എയാണ് വിളനാശവും മണല്‍ക്ഷാമവും അടക്കമുള്ള വിഷയങ്ങള്‍ സമിതിയുടെ ശ്രദ്ധയില്‍ പെടുത്തിയത്. മൂവാറ്റുപുഴ താലൂക്കില്‍ അറുന്നൂറോളം ജാതിമരങ്ങളാണ് മഴയിലും കാറ്റിലും കടപുഴകിയത്. മറ്റ് വിളകള്‍ക്കും കാര്യമായ നാശമുണ്ടായതായി അദ്ദേഹം ചൂണ്ടിക്കാട്ടി. സര്‍ക്കാരില്‍ നിന്നും തുക ലഭ്യമാകുന്ന മുറയ്ക്ക് കര്‍ഷകര്‍ക്ക് നഷ്ടപരിഹാരം അനുവദിക്കാനാകുമെന്ന് കൃഷിവകുപ്പ് അധികൃതര്‍ പറഞ്ഞു.
ജില്ലയിലെ ഉള്‍പ്രദേശങ്ങളിലേക്കുള്ള കെ.എസ്.ആര്‍.ടി.സി സര്‍വീസ് അവതാളത്തിലായിരിക്കുകയാണെന്നും എല്‍ദോ എബ്രഹാം പറഞ്ഞു. ഗ്രാമീണ സര്‍വീസുകള്‍ പലതും വെട്ടിക്കുറച്ചു. ഉള്ളവ തന്നെ സമയക്ലിപ്തത പാലിക്കുന്നില്ല. പുലര്‍ച്ചെയും രാത്രി വൈകിയുമുള്ള സര്‍വീസുകള്‍ ട്രിപ്പ് മുടക്കുന്നത് തടയണമെന്നും അദ്ദേഹം ആവശ്യപ്പെട്ടു.
കെ.എസ്.ടി.പി പദ്ധതിയില്‍ എം.സി റോഡ് നിര്‍മാണത്തിലെ അശാസ്ത്രീയത മൂലം കൂത്താട്ടുകുളം ഭാഗത്ത് അപകടം പതിവായിരിക്കുകയാണെന്നും കൂത്താട്ടുകുളം ടൗണിലെ വെള്ളക്കെട്ട് പരിഹരിക്കണമെന്നും അനൂപ് ജേക്കബ് എം.എല്‍.എ പറഞ്ഞു. റോഡരികില്‍ അപകടാവസ്ഥയിലുള്ള വൃക്ഷങ്ങളും ശിഖരങ്ങളും നീക്കാന്‍ അധികൃതര്‍ നടപടി സ്വീകരിക്കുന്നില്ലെന്നും യോഗത്തില്‍ പരാതി ഉയര്‍ന്നു. അടിയന്തര സാഹചര്യത്തില്‍ വാക്കാല്‍ അനുമതിയോടെ ബന്ധപ്പെട്ട വകുപ്പുകള്‍ക്ക് വൃക്ഷങ്ങളും ശിഖരങ്ങളും നീക്കം ചെയ്യാവുന്നതാണെന്ന് കലക്ടര്‍ വ്യക്തമാക്കി. കുഴികള്‍ നിറഞ്ഞത് മൂലം പിറവം പാലം ഗതാഗതയോഗ്യമല്ലാതായിരിക്കുകയാണെന്ന് നഗരസഭാ ചെയര്‍മാന്‍ സാബു.കെ.ജേക്കബ് പറഞ്ഞു. കുഴികള്‍ മൂടാന്‍ ഈയാഴ്ച്ച തന്നെ നടപടി സ്വീകരിക്കുമെന്ന് പൊതുമരാമത്ത് വകുപ്പ് അറിയിച്ചു.
മുളന്തുരുത്തി ചങ്ങോലിപ്പാടം റെയില്‍വെ മേല്‍പ്പാലം നിര്‍മാണത്തിനുള്ള സ്ഥലമെടുപ്പ് വേഗത്തില്‍ പൂര്‍ത്തിയാക്കണമെന്ന് ജോസ്.കെ. മാണി എം.പിയുടെ പ്രതിനിധി ജില്‍സ് പെരിയപ്പുറം നിര്‍ദേശിച്ചു. കൊച്ചിന്‍ ഹാര്‍ബര്‍ ടെര്‍മിനസിലേക്കുള്ള ട്രെയിന്‍ സര്‍വീസ് പുനരാരംഭിക്കുന്ന സാഹചര്യത്തില്‍ വാത്തുരുത്തിയില്‍ റെയില്‍വേ മേല്‍പ്പാലം നിര്‍മിക്കുന്നതിനുള്ള നടപടികള്‍ വേഗത്തിലാക്കണമെന്ന് പ്രൊഫ. കെ.വി. തോമസ് എം.പിയുടെ പ്രതിനിധി എം.പി ശിവദത്തന്‍ ആവശ്യപ്പെട്ടു.  ചെല്ലാനം മിനി ഹാര്‍ബര്‍ നിര്‍മാണത്തിന് ഭരണാനുമതി ലഭിച്ചെങ്കിലും സ്ഥലം ഏറ്റെടുക്കുന്നതിന് തുക ലഭ്യമായിട്ടില്ലെന്ന് റവന്യൂ അധികൃതര്‍ യോഗത്തെ അറിയിച്ചു.
എം.എല്‍.എമാരായ പി.ടി. തോമസ്, റോജി.എം.ജോണ്‍, മരട് നഗരസഭ ചെയര്‍പഴ്‌സണല്‍ സുനില സിബി, പറവൂര്‍ നഗരസഭ ചെയര്‍മാന്‍ രമേഷ്.ഡി.കുറുപ്പ്, ജില്ലാ പ്ലാനിങ് ഓഫീസര്‍ സാലി ജോസഫ് തുടങ്ങിയവര്‍ പങ്കെടുത്തു.





ജില്ലാതല ഓണാഘോഷം 11 കേന്ദ്രങ്ങളില്‍


കൊച്ചി: ടൂറിസം വകുപ്പിന്റെയും ജില്ലാ ടൂറിസം പ്രമോഷന്‍ കൗണ്‍സിലിന്റെയും ആഭിമുഖ്യത്തില്‍ സെപ്റ്റംബര്‍ 02 മുതല്‍ 06 വരെ ജില്ലയിലെ 11 കേന്ദ്രങ്ങളിലായി സംഘടിപ്പിക്കാന്‍ ഡി.ടി.പി.സി ജനറല്‍ കൗണ്‍സില്‍ തീരുമാനിച്ചു. ഓണാഘോഷം നഗരത്തിന് പുറത്തേക്ക് വ്യാപിപ്പിക്കണമെന്ന് എം.എല്‍.എമാരടക്കമുള്ള ജനപ്രതിനിധികള്‍ ആവശ്യപ്പെട്ടതിനെ തുടര്‍ന്നാണിത്. 11 കേന്ദ്രങ്ങളില്‍ ആഘോഷം സംഘടിപ്പിക്കാന്‍ നിര്‍ദേശിച്ച യോഗം ഇതു സംബന്ധിച്ച അന്തിമതീരുമാനത്തിന് എക്‌സിക്യുട്ടീവ് കമ്മിറ്റിയെ ചുമതലപ്പെടുത്തി.
വാരാഘോഷത്തിന്റെ ഭാഗമായി കലാപരിപാടികള്‍ അവതരിപ്പിക്കുന്ന കലാസംഘങ്ങളുടെ തിരഞ്ഞെടുപ്പ് സുതാര്യമായിരിക്കണമെന്ന് പി.ടി. തോമസ് എം.എല്‍.എ നിര്‍ദേശിച്ചു. കലാസംഘങ്ങളെ തിരഞ്ഞെടുക്കുന്നതിന് ഉപസമിതി രൂപീകരിക്കുമെന്നും ഫെസ്റ്റിവല്‍ ഡയറക്ടറെ നിയമിക്കുന്നത് പരിഗണനയിലുണ്ടെന്നും ഡി.ടി.പി.സി ചെയര്‍മാന്‍ കൂടിയായ ജില്ലാ കലക്ടര്‍ മുഹമ്മദ് വൈ സഫിറുള്ള അറിയിച്ചു.
ജില്ലാതലത്തില്‍ ഓണം വാരാഘോഷത്തിനായി 32 ലക്ഷം രൂപയാണ് സര്‍ക്കാര്‍ അനുവദിച്ചിരിക്കുന്നത്. ഇതിന് പുറമെ സ്‌പോണ്‍സര്‍ഷിപ്പിലൂടെയും പണം കണ്ടെത്തും. വിവിധ സ്ഥലങ്ങളില്‍ തഹസില്‍ദാര്‍മാര്‍ കണ്‍വീനര്‍മാരായി രൂപീകരിക്കുന്ന സംഘാടകസമിതികളാണ് വാരാഘോഷത്തിന് നേതൃത്വം നല്‍കുക.
ഓണം വാരാഘോഷം വീകേന്ദ്രീകരിക്കണമെന്നും പ്രാദേശികമായ അഭിരുചികള്‍ കണക്കിലെടുത്ത് പരിപാടികള്‍ക്ക് രൂപം നല്‍കണമെന്നും എം.എല്‍.എമാരായ എല്‍ദോ എബ്രഹാം, റോജി.എം.ജോണ്‍ എന്നിവര്‍ പറഞ്ഞു. പിറവം നഗരസഭയുടെ ആഭിമുഖ്യത്തില്‍ സംഘടിപ്പിക്കുന്ന ഓണാഘോഷത്തിന് സാമ്പത്തിക പിന്തുണ നല്‍കണമെന്ന് ചെയര്‍മാന്‍ സാബു.കെ.ജേക്കബ് ആവശ്യപ്പെട്ടു. പരിപാടികള്‍ക്ക് പിന്തുണ നല്‍കുമെന്നും അതേസമയം ഗതാഗത തടസം സൃഷ്ടിക്കുന്ന രീതിയിലുള്ള ഘോഷയാത്രകളെ അനുകൂലിക്കുന്നില്ലെന്നും കലക്ടര്‍ പറഞ്ഞു.
കൊച്ചിയില്‍ മുന്‍കാലങ്ങളില്‍ നടന്നിട്ടുള്ള ഇന്ദിരാഗാന്ധി ജലോത്സവം പുനരാരംഭിക്കണമെന്ന് പി.ടി. തോമസ് എം.എല്‍.എ നിര്‍ദേശിച്ചു. പറവൂര്‍ നഗരസഭ ചെയര്‍മാന്‍ രമേഷ്.ഡി.കുറുപ്പ്, പ്രൊഫ. കെ.വി. തോമസ് എംപിയുടെ പ്രതിനിധി എം.പി ശിവദത്തന്‍, ജോസ്.കെ. മാണി എം.പിയുടെ പ്രതിനിധി ജില്‍സ് പെരിയപ്പുറം, ഡി.ടി.പി.സി അംഗങ്ങളായ പി.ആര്‍. റെനീഷ്, സാബു ജോര്‍ജ്, പ്രകാശ്, ഡി.ടി.പി.സി സെക്രട്ടറി വിജയകുമാര്‍, വിവിധ വകുപ്പുകളുടെ ജില്ലാതല മേധാവികള്‍ തുടങ്ങിയവര്‍ യോഗത്തില്‍ പങ്കെടുത്തു.





ശിഹാബ് തങ്ങള്‍ സെന്റ് ഗ്രെയ്‌സ് 2017 ഇന്ന്

കളമശ്ശേരി: കങ്ങരപ്പടി ശിഹാബ് തങ്ങള്‍ സെന്റര്‍ ഫോര്‍ ഹ്യൂമന്‍ വെല്‍ഫെയര്‍ സംഘടിപ്പിക്കുന്ന ഗ്രെയ്‌സ് 2017 വിദ്യാഭ്യാസ അവാര്‍ഡ് ദാനവും നിര്‍ധന രോഗികള്‍ക്കുള്ള പെന്‍ഷന്‍ പദ്ധതിയുടെ മൂന്നാംഘട്ട ഉദ്ഘാടനവും ഇന്ന് രാവിലെ 9.30ന് കങ്ങരപ്പടി ഇസ്‌ലാമിക് സെന്ററില്‍ ടി.എ അഹമ്മദ് കബീര്‍ എം.എല്‍.എ നിര്‍വഹിക്കും. സെന്റര്‍ പ്രസിഡന്റ് പി.എം ഫൈസല്‍ അധ്യക്ഷത വഹിക്കും. മത- സാംസ്‌കാരിക വിദ്യാഭ്യാസ രംഗത്തെ പ്രമുഖര്‍ സംഗമത്തില്‍ പങ്കെടുക്കുമെന്ന് ഭാരവാഹികള്‍ അറിയിച്ചു.