കൊച്ചി: കാഴ്ച പരിമിതര്‍ക്കുള്ള രണ്ടാമത് ഇന്‍ഡസ്ഇന്‍ഡ് ബാങ്ക് നാഗേഷ് ട്രോഫി ടി20 ക്രിക്കറ്റ് ടൂര്‍ണമെന്റിന്റെ കൊച്ചിയിലെ മത്സരങ്ങള്‍ ഇന്ന് ആരംഭിക്കും. ഇന്ന് മുതല്‍ 23 വരെ കൊച്ചി കളമശേരി സെന്റ് പോള്‍സ് കോളജ് ഗ്രൗണ്ടിലാണ് മത്സരങ്ങള്‍ നടക്കുക. രാവിലെ ഒന്‍പതിന് രഞ്ജി താരം സച്ചിന്‍ ബേബി മത്സരങ്ങള്‍ ഉദ്ഘാടനം ചെയ്യും. കേരളവും ജാര്‍ഖണ്ഡും തമ്മിലാണ് ആദ്യത്തെ മത്സരം. ഉച്ചയ്ക്ക് 1.30ന് നടക്കുന്ന മത്സരത്തില്‍ ആന്ധ്രാ പ്രദേശ് മഹാരാഷ്ട്രയെ നേരിടും. 22ന് രാവിലെ 9.30ന് നടക്കുന്ന മത്സരത്തില്‍ കേരളവും മഹാരാഷ്ട്രയും തമ്മില്‍ ഏറ്റുമുട്ടും. ഉച്ചയ്ക്ക് 1.30ന് ആന്ധ്രാ പ്രദേശ് ജാര്‍ഖണ്ഡ് മത്സരവും നടക്കും.
23ന് കേരള-ആന്ധ്രാ പ്രദേശ് മത്സരത്തോട് കൂടി കൊച്ചിയിലെ മത്സരങ്ങള്‍ അവസാനിക്കും. കേരളത്തിന്റെ ശേഷിക്കുന്ന ഗ്രൂപ്പ് മത്സരങ്ങള്‍ ഡിസംബര്‍ 10നും 11നും ചെന്നൈയില്‍ നടക്കും.എലൈറ്റ് ഗ്രൂപ്പ് ബിയില്‍ മഹാരാഷ്ട്ര, ജാര്‍ഖണ്ഡ്, ആന്ധ്രാ പ്രദേശ്, വെസ്റ്റ് ബെംഗാള്‍ എന്നീ ടീമുകള്‍ക്കൊപ്പമാണ് കേരളം. ക്രിക്കറ്റ് അസോസിയേഷന്‍ ഫോര്‍ ദി ബ്ലൈന്‍ഡ് ഇന്‍ കേരളയാണ് (സി.എ.ബി.കെ) കൊച്ചിയില്‍ നടക്കുന്ന മത്സരങ്ങളുടെ സംഘാടകര്‍. മുത്തൂറ്റ് പാപ്പച്ചന്‍ ഗ്രൂപ്പാണ് കേരള ടീമിന്റെ സ്‌പോണ്‍സര്‍മാര്‍. നാഗേഷ് ട്രോഫിയുടെ ഉദ്ഘാടന പതിപ്പില്‍ കേരളം ക്വാര്‍ട്ടര്‍ ഫൈനല്‍ വരെ എത്തിയിരുന്നു. ഒരു ലക്ഷം രൂപയാണ് ഇന്‍ഡസ്ഇന്‍ഡ് ബാങ്ക് നാഗേഷ് ട്രോഫി ടൂര്‍ണമെന്റ് വിജയികള്‍ക്ക് ലഭിക്കുന്നത്. റണ്ണേഴ്‌സ് അപ്പിന് 75,000 രൂപയും തോറ്റ രണ്ട് സെമി ഫൈനലിസ്റ്റുകള്‍ക്ക് 40,000 രൂപ വീതവും ലഭിക്കും. കേരള ബ്ലൈന്‍ഡ് ടീം : മനീഷ് .എ(ക്യാപ്റ്റന്‍), വേണുഗോപാല്‍, വിഷ്ണു. ബി, സബിര്‍. പി, അനന്ദു ശശികുമാര്‍, ഷാജഹാന്‍. ജെ, അബ്ദുള്‍ മുനാസ്. കെ, അജേഷ്. എ, വിഷ്ണു യു.പി, ബാസില്‍ ഇസ്മായില്‍ കെ.എം, മുഹമ്മദ് ഫര്‍ഹാന്‍ എ, സുജിത് എം.എസ്, ജിനീഷ് കെ.എം, വിഷ്ണു എന്‍.കെ, വികാ അഗര്‍വാള്‍(പരിശീലകന്‍), രാജന്‍. ഇ(മാനേജര്‍).