ചെന്നൈ: രാഷ്ട്രീയ പ്രവേശനത്തിനും നടപടികളിലും സിനിമകളിലെന്നപോലെ വീണ്ടും സസ്‌പെന്‍സുമായി തമിഴ്‌നടന്‍ രജനീകാന്ത്. കമലഹാസന്റെ മക്കള്‍ നീതി മയ്യം പാര്‍ട്ടിയുമായി യോജിക്കുന്ന കാര്യത്തില്‍ ഉള്‍പ്പെടെ ഉടന്‍ തീരുമാനം വ്യക്തമാക്കുമെന്നും 2021ല്‍ സംസ്ഥാനത്ത് നടക്കുന്ന തെരഞ്ഞെടുപ്പില്‍ തമിഴ്മക്കള്‍ക്ക് 100ശതമാനം അദ്ഭുതങ്ങള്‍ പ്രതീക്ഷിക്കാമെന്നും അദ്ദേഹം പറഞ്ഞു.

മുഖ്യമന്ത്രി സ്ഥാനാര്‍ഥി ആരാകുമെന്ന മാധ്യമപ്രവര്‍ത്തകരുടെ ചോദ്യത്തിന് അതെല്ലാം തെരഞ്ഞെടുപ്പ് സമയത്ത് പാര്‍ട്ടി പ്രവര്‍ത്തകര്‍ തീരുമാനിക്കുമെന്നായിരുന്നു അദ്ദേഹത്തിന്റെ മറുപടി. കഴിഞ്ഞ ദിവസം കമല്‍ ഹാസനും രജനീകാന്തും തമ്മില്‍ ചര്‍ച്ച നടത്തിയതിനെ തുടര്‍ന്നാണ് ഇരുവരും രാഷ്ട്രീയത്തില്‍ ഒരുമിക്കുന്നുവെന്ന അഭ്യൂഹങ്ങള്‍ ശക്തമായത്. തമിഴ്‌നാടിന്റെ വികസനത്തിന് ആവശ്യമെങ്കില്‍ ഞങ്ങള്‍ ഒരുമിച്ച് നടക്കുമെന്നും ഇപ്പോള്‍ പ്രവൃത്തിയാണ് പ്രധാനമെന്നും നിലപാട് സംബന്ധിച്ച് പിന്നീട് വിശദീകരിക്കുമെന്നും കൂടിക്കാഴ്ചക്ക് ശേഷം കമലഹാസന്‍ പറഞ്ഞിരുന്നു.