വടകര: രോഗികള്‍ക്കും സ്റ്റാഫിനും നിത്യ ദുരിതം നല്‍കുന്ന ഇടമായി വടകര ജില്ലാ ആശുപത്രി മാറി. ആവശ്യത്തിന് ഡോക്ടര്‍മാരില്ലാത്ത ആശുപത്രിയില്‍ രോഗികള്‍ വലയുകയാണ്. ഉച്ചവരെ ജനറല്‍ മെഡിസിന്‍ ഡോക്ടര്‍മാര്‍ മാത്രമാണ് ഒ.പിയിലുള്ളത്. ഉച്ചക്കുശേഷം എല്ലാ രോഗികള്‍ക്കും അത്യാഹിത വിഭാഗമാണ് ആശ്രയം.
അത്യാഹിത വിഭാഗത്തില്‍ അതുകൊണ്ടുതന്നെ രോഗികളുടെ നീണ്ട നിരയാണ്. പകര്‍ച്ചവ്യാധികള്‍ പെരുകുന്ന കാലത്ത് ആയിരക്കണക്കിന് രോഗികളാണ് നിത്യവും ഇവിടെയെത്തുന്നത്. അത്യാഹിത വിഭാഗത്തില്‍മാത്രം നൂറുകണക്കിന് ആളുകളാണ് എത്തുന്നത്. അത്യാഹിത വിഭാഗവും വാര്‍ഡുകളും തമ്മില്‍ ദൂരക്കൂടുതലുള്ളത് രോഗികളെ ബുദ്ധിമുട്ടിക്കുന്നു. മെയിന്‍ ബില്‍ഡിങില്‍ ഓപറേഷന്‍ തിയറ്ററും ഐ.സി.യുവും മുകള്‍ നിലയിലായതിനാല്‍ അപകടത്തില്‍പെട്ടും മറ്റുമെത്തുന്ന നടക്കാന്‍ കഴിയാത്ത രോഗികളെ കോണിപ്പടിയിലൂടെ എടുത്ത് കൊണ്ടുപോകേണ്ടി വരുന്ന അവസ്ഥയാണ്. വീല്‍ചെയര്‍ കൊണ്ടുപോകാന്‍ റാംപുമില്ല. മുകള്‍ നിലയിലെ വാര്‍ഡുകളിലേക്ക് മരുന്നുകളും ഭക്ഷണ സാധനങ്ങളും എത്തിക്കാന്‍ സ്റ്റാഫും ബുദ്ധിമുട്ടുന്ന അവസ്ഥയാണ്.
ഇത്രയും ബുദ്ധിമുട്ടുകള്‍ക്കിടയിലും രോഗികളെ കാണാനെത്തുന്നവര്‍ക്കുള്ള പ്രവേശന പാസിന്റെ നിരക്ക് ഇരട്ടിയാക്കിയിരിക്കുകയാണ്. അഞ്ചുരൂപയായിരുന്ന പ്രവേശന പാസ് പത്തുരൂപയാക്കിയ മാറ്റിയിരിക്കുകയാണ്. അടിസ്ഥാന സൗകര്യങ്ങളൊരുക്കാതെയുള്ള ഫീസ് വര്‍ധനവിനെതിരെ രോഗികള്‍ക്കും കൂട്ടിരിപ്പുകാര്‍ക്കും ശക്തമായ പ്രതിഷേധമാണുള്ളത്.