കോട്ടയം: സംക്രാന്തി മുണ്ടകംപാടം ഭാഗത്ത് താമസിക്കുന്ന അന്യ സംസ്ഥാന തൊഴിലാളിയുടെ വീട്ടില്‍ നിന്നും ഒരു കിലോ കഞ്ചാവ് പിടികൂടി.ഇന്നലെ വൈകിട്ട് നാഗമ്പടം ഭാഗത്ത് പട്രോളിംഗ് നടത്തിയ എക്‌സൈസ് സംഘത്തിന് ലഭിച്ച രഹസ്യ വിവരത്തെ തുടര്‍ന്ന് നടത്തിയ പരിശോധനയിലാണ് കഞ്ചാവ് പിടികൂടിയത്. പതിനഞ്ച് വര്‍ഷം മുന്‍പ് സംക്രാന്തിയില്‍ വീടു വാങ്ങി താമസിക്കുന്ന ഒറീസാ സ്വദേശിയായ സബീത്ത് ബേട്ടാ എന്നയാളുടെ വീടിനുള്ളില്‍ നിന്നാണ് കഞ്ചാവ് കണ്ടെത്തിയത്. എക്‌സൈസ് സംഘം എത്തിയ സംയത്ത് പ്രതി വീട്ടില്‍ ഇല്ലായിരുന്നു. പ്രതിയുടെ കിടപ്പുമുറിക്കുളില്‍ കട്ടിലിനടിയില്‍ ഒളിപ്പിച്ച നിലയിലായിരുന്നു കഞ്ചാവ് സൂക്ഷിച്ചിരുന്നത്. കോട്ടയം എക്‌സൈസ് റേഞ്ച് ഇന്‍സ്‌പെക്ടര്‍ അജയ് കെ.ആര്‍., സിവില്‍ എക്‌സൈസ് ഓഫീസര്‍മാരായ അഞ്ചിത്ത്, പ്രസീദ്, മാനുവേല്‍, സുരേഷ്, അനസ് എന്നിവരുടെ നേതൃത്വത്തിലുള്ള എക്‌സൈസ് സംഘമാണ് കഞ്ചാവ് കണ്ടെത്തിയത്.