ചേലേരി: കാറിലെത്തിയ സംഘം പട്ടാപ്പകല്‍ ബൈക്ക് യാത്രക്കാരനെ തട്ടിക്കൊണ്ടു പോയി. ചേലേരി ഈശാനമംഗലത്തിനു സമീപത്ത് നിന്നാണ് ഇന്നലെ  ബൈക്ക് യാത്രക്കാരനെ തട്ടിക്കൊണ്ടു പോയത്. ബൈക്കിലുണ്ടായിരുന്ന പണം തട്ടാനായിരുന്നു കാറിലെത്തിയ സംഘം ഇയാളെ പിന്തുടര്‍ന്നതെന്ന് സംശയിക്കുന്നു. ഇയാളെ തട്ടിക്കൊണ്ടു പോയെങ്കിലും സംഘത്തിന് പണം തട്ടിയെടുക്കാന്‍ കഴിഞ്ഞില്ല. പണം ബൈക്കിലാണ് ഉണ്ടായിരുന്നത്. രണ്ടര ലക്ഷത്തോളം രൂപ ബൈക്കിലുണ്ടായിരുന്നത്രേ. ബൈക്കും പണവും ഇപ്പോള്‍ പൊലിസ് കസ്റ്റഡിയിലാണ്. ഇന്നലെ ഉച്ചയോടെയാണ് സംഭവം. ബൈക്ക് യാത്രക്കാരന്‍ കുഴല്‍പ്പണ ഏജന്റാണെന്നും സംശയിക്കുന്നു. എന്നാല്‍ കാറിലെത്തിയ സംഘത്തെ കുറിച്ച് യാതൊരു വിവരവും ലഭിച്ചിട്ടില്ല. കാറിന്റെ നമ്പര്‍ നാട്ടുകാര്‍ പറഞ്ഞതനുസരിച്ച് പൊലിസ് പരിശോധിച്ചെങ്കിലും വ്യാജമാണെന്ന് തെളിഞ്ഞു. സംഭവത്തെകുറിച്ച് പൊലിസ് കൂടുതല്‍ അന്വേഷണം ആരംഭിച്ചിട്ടുണ്ട്.